Ha jan man la ka sngi, ki pulit ki pynbna halor ka jingshah tuh jong ki kali ne ar shaka ha kylleng ka jylla. Ngi la sngewtriem shisha ban tip halor ka jingjyllei jong ki nonglute kali bad ar shaka ha ki bynta bapher-bapher ha kaba wat na phyllaw ïing ruh dang shah rong ei ki kali bad ki ar shaka. Lada ngi peit na kaei kaba la ju jia mynshwa, kita ki nonglute ki ju pynkylla ïa ki nombor jong ka ‘engine’ bad ‘chassis’ bad kumjuh ruh ïa ki kot ban pyni ïa ka jinglong trai hashuwa ba kin tyrwa die sha ki paidbah kiba lui-lui. Ka jingïoh kurup ïa ki ar shaka kiba rem dor ka pyni ïa ka jingshyrkhei jong ki nonglute. Lehse ki la don ki riew paidbah kiba la dep ban thied teng ïa kita ki ar shaka ha ka jingbymtip ïa ka sdang ka kut. Hynrei kane ka dei ka lad ïa ki ba kin wan shakhmat ban pyntip sha ki bor jong ka aiñ khnang ba kin lait na ki jingeh hadien habud. Ngi dei ruh ban kdew ba shisien ba la shah tuh, ka long kaba eh ban ïoh biang pat lait noh sa tang da trei shitom ki briew jong ka aiñ. Ngi ïohi ba ki don ruh ki nongtuh kiba leit buh ïa ki ar shaka shaduh sha khappud bad ka Bangladesh khnang ban ïoh die sha ki nongshong shnong jong kato ka Ri.
Naduh ki por kiba mynshuwa, ki ju don ki snar lute kiba treikam ha Meghalaya bad ha kiwei pat ki jylla ban tuh ïa ki kali bad ki ar shaka hashuwa ban die shawei pat. Ngi ïohi ba ki kam tuh kali bad ar shaka ki la nang jur katba nang mih ki sngi. Ki briew ki la nang kham kiew ha ka ïoh ka kot bad ki don ka bor ban thied ïa ki mar ki mata bapher bapher. Hynrei ka jingbymdon ki jaka set ba biang ha la ïing la sem bad da ka jingbym banse ki hap ban set sha surok, ki nonglute ki ïoh lad ban lute naphang naduh ki tiar kali haduh ki kali. Wat ha Shillong bad ha ki khap sor, ki don bun bah ki jingjia kiba ïadei bad ka jinglute ïa ki kali bad ki ar shaka kam pher la ka dei ha ka por ba don ka jingkhangdam ne ka korphiw. Ki nonglute ki mih beit shakhmat ban pyndep ïa ka kam kaba ki thmu bad la bun sa tang ki ejahar ha ki thanat pulit bapher bapher.
Ki pulit kiba don ha ki District bapher bapher ki dei ban trei shitom khnang ban ym ailad ïa ki nonglute ba kin ïoh ban knieh jubor ïa ka umsyep ka jong kiwei. Ki pulit ki dei ban pynkhlaiñ naduh ka jingsyntiat haduh ka rukom wad ïa ki nonglute kiba lehse ki don ki jaka rieh ki jong ki sha kiwei pat ki jylla. Lada ki pulit kim lah ban thwet bad kem ïa kiba donkti ban lute, ki paidbah kin duh jingshaniah bad ka umsyep kaba ki la theh ban thied ïa ki kali ne ki ar shaka kan shu long lehnohei.
Na ka liang ki paidbah ruh ki dei ban long kiba husiar haba ki thied ïa ki kali ne ki ar shaka kiba la dep ban pyndonkam shuwa da mano re mano. Kim dei ban shu kurup kulmar tang namar ba ki ïoh ha ka dor kaba tad. Ka mar kaba tad than bunsien kam ju kham long. Hap ban peit ïa ki kot ki sla bad kiwei ki jingdonkam hashuwa ba kin thied. Ha kane ka juk stad mynta, ki bun bah ki briew kiba pyndonkam ïa ki rynsan jong ka ‘Internet’ ban tyrwa bad thied ïa ki mar bapher bapher – naduh ki ïing haduh ki ‘mobile phone’. Ki la don ruh bun ki khep ba ki nongthied ki la shah shukor ha kita kiba kam ïalade bad ki dei ki nongdie wat lada ki la dep ban siew lut ïa ka pisa kumba ki la ïakut. Hooid, ha ka jinglong briew mano bym kwah ïa ki mar kiba wan ha ka dor kaba bit. Hynrei tangba bit ka bor kam mut ba ka mar ka long ruh kaba bit ne ka bakhuid. Ka jingeh ïa ki nongthied kan long hadien habud ynda ki la tip ba ki mar kiba ki la thied ki dei kiba la shu tuh na kiwei. Hangta, ki lah ban mih ki jingeh bad ki lah ruh ban duh noh ïa kaei kaba ki la dep thied.
Namarkata, ka dei ban don ka jingïatreilang hapdeng ki pulit bad ki paidbah ban khanglad ïa ki nonglute bad ki khwan myntoi. Lada ka don ka jingïatreilang kaba jan, yn sa lah ban ïakhun pyrshah ïa ki nongtuh bad yn lah ban ïada ïa ki mar ki mata kiba rem dor bad ïa kiba la thied da ka jingtrei shitom bad ka umsyep bakordor.
