Shillong, Jymmang 09
Ka Real Madrid ka la lah ban pynliem noh ïa ka Bayern Munich da 2-1 kol ha ka semi final (2nd leg) na ka bynta ban tam da 4-3 lyngba ka aggregate bad ban ïoh rung sha ka final ha ka Champions League.
Ha kane ka jingïakhun semi final kaba la long ha ka step jong ka Sngi Palei ha Santiago Bernabeu, baroh ar ki kynhun ki la pyrshang ban ïakhun tyng -eh naduh kaba sdang. Hapdeng kane ka jingïa-khun kine ki kynhun kim shym la lah ban thep kol haduh kaba kut jong ka kylla step.
Kine ki kynhun ki la ïakhaid mar 2-2 kol ha ka wat kaba nyngkong jong kane ka jingïakhun. Hynrei hadien ba la bteng ïa ka jingïakhun jong ka kylla miet ka Real ka la shah thep kol nyngkong eh ha ka Bayern lyngba u rangïalehkai ba wan mihpli u Alphonso Davies ha ka minit kaba 68.
Kane ka shi kol ka la nang pynïoh jingkyrmen ïa ka Bayern na ka bynta ban kynjoh sha ka thong. Hynrei ka Real kam shym la duh jingkyrmen namar ka la ïoh ka jingkyrshan ba pura na ki paidbah ha la ïing bad dei ha ka minit kaba 88 ba ka la lah ban pynïakhaid kylla lyngba u Joselu na ka daw ka jingbakla u rangapkol ka Bayern u Manuel Neuer.
Une u rangïalehkai shakhmat u la ïoh ban thep biang ïa ka kol kaba ar shwa ban wai ha ka minit kaba 90+1 na ka bynta ban pynlong ïa ka Real ban jop syndon.
Halor kane ka jingjop, na ka liang u rangïalehkai shapdeng u Jude Belling-ham u la pynpaw, “Kane ka long ka jingangnud jong ka kynhun ban kynjoh sha ka thong. Kam pher mano ban thep kol, hynrei u don uwei uba lah ban pynurlong. Kane ka long ka mynsiem ban ïakhun khlem da pynlehnohei ïa ki kabu ksiar.”
Ha kawei pat ka liang u rangïalehkai ‘dien ka Munich u Matthijs De Ligt u la pynpaw ka jingdiaw mynsiem halor kane ka jingshah rem.
Watla katei ka lahduh jong ka Bundesliga ka la khmih lynti ban kynjoh sha ka thong, hynrei da kane ka jingshah rem ka la pynlong ia ka ban kut noh ka jingïaid lynti ha ka Champions League. U Manager kane ka kynhun u Thomas Tuchel u la pynpaw da kaba ong, “Kane ka jingshah rem ka dei ka jingshet kylla ha kaba kut.”
Lyngba ka jingjop, ka Real Madrid ka la khmih lynti ban rah ïa ka nam lahduh kaba 15 sien ha ka Champions League ha kaba kan pynkhreh ïa ka jingïakhun final ka ban long ha ka 2 tarik u Jylliew ha Wembley pyrshah ïa ka Borussia Dortmund, kaba la lah ban pynliem noh ïa ka PSG ha kawei pat ka jingïakhun semi final kaba nyngkong.
