Chandigarh, Jymmang:
U Senior Superintendent of Police (SSP) jong ka Fazilka u Pragya Jain u la ong ba hadien ba la ïoh jingtip kaba bniah, ka la don ka jingleit thwet bad jurip bniah ha ka thaiñ khappud jong ka shnong Ganjuana bad ha kane ka jingpyntreikam la lap ïa ka Drone (China-made DJI Mavic 3 classic) na kawei ka lyngkha.
Ar tylli ki Drone la lap na ki distrik kiba don ha ka bynta khappud jong ka Punjab ha ki sngi ba la leit, la ïathuh ki pulit ha ka sngi Ba-ar. Ha ka jingjia kaba nyngkong, ka la don ka jingïatreilang jong ki pulit ka Fazilka bad ki shipai Border Security Force (BSF) ha kaba ki la ïoh ban kurup ïa ka Drone na ka shnong Ganjuana.
Ha kawei pat ka jingjia, kata ha ka jingjia kaba ar, ki shipai BSF ki la lap ïa ka Drone kaba don habar jong kawei ka ïing kaba don ha ka shnong Hardo Rattan ha Amritsar. Katkum ka jingïathuh jong ki shipai ka tnat BSF la ong ba ka jingïoh ban kurup ïa kane ka Drone ka la long ha ka por ba la pynlong ïa ka jingleit thwet hadien ba la ïoh jingtip kaba bniah.
Ïa ka Drone ba la ïoh ban kurup ha kane kawei ka jingjia ruh la shem ba ka dei kaba la shna ha China ka DJI Mavic 3 Classic. Hashwa kane, ki shipai BSF ki la ïoh ban kurup ïa ka Drone kaba la pait na ka lyngkha ba marjan bad ka shnong Ratan Khurd kaba don ha Amritsar.
