Shillong, Jymmang 09
Ka BJP Meghalaya ha ka Sngi Palei ka la ïakhih hakhmat ka shlem treikam lade kum ka dak ban pynrem jur ïa ka jingkynthoh jong u Sam Pitroda uba dei u nongïalam ka Congress kaba long shaba palat pud pyrshah ïa ki nongshong shnong ka thaiñ Shatei Lam Mihngi ka ri.
U Nongaiktien ka BJP Meghalaya u Bah M Kharkrang ha ka kyrwoh khubor ba la pyllait u la ong, “Ka long kaba kyndit, kaba lehraiñ ba ka jingkren beiñ jong u Sam Pitroda ka la pynmong ïa ka jingsngew jong man ki nong India bad kaba dei ban pynrem jur tyngeh ïa kane.”
U Bah Kharkrang u la ong, “Kum ki nongshong shnong ba shong ba sah ha ka thaiñ Shatei Lam Mihngi, ngi lap ba ka long kaei-kaei kaba bakla bad kaba sngew ngiah ba don ki briew kiba bat ïa ka kyrdan, ki poi shaduh u pud ban ong ba ka dur ka dar ka jong ngi ka long kum ki China.”
“Ngim dei ki nong China. Nga kwah ban kren da kaba shai kdar ïa u Pitroda, ba ngi baroh ngin peit ha ka ïit bad peit ïa ka jingphalang ïa ka dur kum kita ki nong India kiba sngew sarong, ïa kaba u briew uba ju shong ha kawei pat ka ri, u briew uba la sdang ban isih ïa la ka ri, yn ym lah ban sngewthuh,” la ong u Bah Kharkrang.
“Haba peit ïa une u briew uba dei u nongaibuit jong u Rahul Gandhi, la paw ïa ka rukom pyrkhat ba sniew jong une u briew bad u dei u briew u bym don jingïadei eiei shuh bad ka tynrai lajong,” la ong ka kyrwoh bad bynrap ba kane hi ka pyni ïa ka jingshet kylla bad ka jingpeit khmat jong ka Congress ïa baroh ki nong India. Balei uwei un hap ban shim ïa ki jingai jingmut na uwei pat uba la long u bar ri u bym don ka jingburom ïa ki nong India bad ïa ka dor jong ki nong India?, la buh jingkylli ka BJP.
U la ong ba ka BJP Meghalaya ka don ïa ka jingsngewkhia bad kumta kum ka Congress ka dei ban shim ïa ka jingkitkhlieh halor katei ka jingkren beiñ bad ki nongïalam kim lah ban riehtngen halor katei ka jingkynthoh da kaba shu ong ba kim lah ban pdiang ïa ka jingkren kynthoh u Sam Pitroda.
