New Delhi, Jymmang:
Hadien ka bynta kaba lai jong ka jingthep vote ha ka ilekshon Lok Sabha, u National President jong ka seng BJP ha JP Nadda u la pynlong ïa ka jingïalang bad ki heh nongïalam bad ki ktato katne ngut ki nongkitkam jong ka jaka treikam ka seng ha ka sngi Ba-ar.
U Nadda ha kane ka jingïalang u la kren sani bha ha kaba ïadei bad ki kam ba ïadei bad ka ilekshon bad ba kumno yn pynlong ïa ka jingthep vote katkum ka jingkwah jong ka seng bad ban ïakren sani bha ruh ha kaba ïadei bad ki rukom pyntreikam kiba shakhmat na ka bynta ka jingdon jong kawei pat ka bynta jong ka jingthep vote ha ki Lok Sabha konstitwensi kiba dang sah.
Katkum ka jingphah khubor jong u National General Secretary jong ka seng u Vinod Tawde, u Nadda u la ai ruh ki mat ban ïakren sani bha bad ban leh ïa kaba donkam na ka bynta ban pynkhreh ïa ki sienjam ki ban dang wan.
Ha kaba ïadei bad kane, ka tyllong kubor na ka seng ka la ïathuh shuh shuh da kaba ong ba la ïoh ban pdiang ïa ki jingai jingmut na ki 94 tylli ki konstitwensi katkum ka jingsngew jong ki nongthep vote bad la ïakren ruh ha kaba ïadei bad ki rukom pyntreikam ha ki jingthep vote.
“U la batai shai ruh shaphang ka jingdonkam jong ki longkmie bad ki samla nalor ki nongthep vote kiba dei na ki kynhun SC,ST bad ki OBC ha kaba ïa ka bhah bakyrpang la thmu da ka seng Congress ban pyndam noh ban ai sha kine ki kynhun kiba kyrpang,” la ong ka tyllong khubor jong ka seng BJP.
