Washington, Jymmang:
Ka United States ha kane ka por ka la pynbna ba ka la pynsangeh noh ia katto-katne ki tiar thma bad ki bom ba la thmu ban pynpoi sha ka Israel namar ka jingleit ther bom jong ka Israel sha Rafah wat hadien ka jingmaham jong ka US ba kam dei ban pynthut ia katei ka bynta jong ka nongbah Gaza kaba da ki million ngut ki paidbah nongshong shnong ki riehtngen ha katei ka jaka.
Kumta, la ong ba ka US kumba ka la dep maham ia ka Israel ba kan pynsangeh ia katto katne ki jingiarap kiba ka thmu ban pynpoi sha Israel lada ka Israel ka leh pyrshah ia ka jingmaham jongka, ka US ruh khlem da kylla ktien ka la leh ia kane khnang ban long ka jingmaham ba kham eh ia ka Israel ba kan ym leit hiar thma shuh ia katei ka nongbah Rafah jong ka Gaza.
Namar ka US naduh ba sdang hi ka la khuslai halor ka jingthmu jong ka Israel ban leit hiar thma sha ka thaiñ Rafah namar kiba bun ki paidbah nongshong shnong ka Gaza ki la phet lut sha katei ka bynta namar ka long ka thaiñ kaba ka Israel kam da kham pynthud ne phah hiar thma ia ki shipai jong ka. Hynrei ha kane ka sien, la ong ba ka Israel ka la pyntip ba ki dkhot jong ka Hamas ki kham bun bad ki kham treikam bha na katei ka thaiñ namar ki iohi ba ka Israel kam shym phai khmat sha katei ka bynta jong ka nongbah Gaza bad kumta ka Israel ha kane ka por ka la rai ban leit hiar thma ia katei ka bynta jong ka Gaza khnang ban ioh pynliem noh ia baroh ki dkhot kiba sah jong ka kynhun lehnoh Hamas bad ba ki shipai ka Israel kin ioh ban synshar hi noh ia katei ka nongbah Gaza ynda la ioh ban kurup lut ia ki bynta jong ka Gaza baroh kawei.
Kumta, ha katei ka sngi ka US ka la pyntip ba ka la pynsangeh noh ia ka jingpynpoi ia shi bynta ki tiar thma kiba kynthup ia ki jait bom 1,800 2,000-lb (907 Kg) bad ki bom 1,700 500- lb (226 Kg).
Haduh ka Sngi Palei, la ong ba ka US kam pat shim rai thymmai halor ka jingthmu ban phah biang ia kitei ki tiar thma sha k Israel namar ym pat lah ban iohi jingkylla ha ki rai bad jingthmu jong ka Israel ruh kumjuh.
La ong ba ka sorkar u Biden ka la sdang ban maham ia ka Israel tang mar ia iohi hi ba ka Israel ka la thmu ban leit hiar thma sa sha katei ka bynta jong ka Gaza bad ka US ka la pynpaw ba ka pyrshah jur halor katei ka jingthmu jong ka Israel ha kane ka por.
Namar la ong ba watla ki heh ka Israel bad ki jong ka US ki la ioh ban iakren halor katei ka mat, hynrei ka jingiakren jongki kam shym long kaba tikna bad ki heh ka Israel kim shym la treh ban kular ba kin sangeh noh ia ka jingleit hiar thma sha Rafah bad kumta na ka liang ka US ruh kam banse ban bat ne ban pynsangeh noh ia kitei ki jingiarap kiba ka la thmu ban phah sha ka Israel ha kane ka por.
Hynrei kumba la iohi ia ka jinglong- jingman ha kane ka por ba mynta, ka Israel ha ka Sngi Ba-ar ka la phah ia ki tup thma jongka sha Rafah katba ka dang pynkhreh ban leit hiar thma jur ia katei ka bynta. Ha kajuh ruh ka por, ka Israel ka la khang noh ia u khappud jongka bad ka Gaza hynrei ka la shu ailad tang ia ki katto katne ki kam kiba kongsan kumba la kyntu da ka US ban pyllait ia ka jingpynpoi ia ki jingdonkam ba kongsan sha ki paidbah jong ka Gaza kaba dei ban iaid lyngba na katei ka bynta khappud jong ka Israel.
