Nongpoh, Jymmang 09
Ka shlem treikam u District Sports Officer (DSO) Ri Bhoi District ka la sdang ïa ka lympung ïalehkai District Level Inter School Athletics Meet 2024 ha ka Sngi Palei ha madan ïalehkai jong ka NSCA ha Pahamsyiem, Nongpoh.
Ha kane ka lympung ïalehkai ka ban neh haduh lai sngi lynter, la wan shim bynta shitrhem da kumba 1114 ngut ki khynnah pule na ki 30 tylli ki skul na kylleng ki jaka jong ka Ri Bhoi District kaba la phiah ha ki lai bynta, kata na ka bynta kiba hapoh 14 snem, 16 snem bad kiba hapoh 18 snem ha ka liang jong ki kynthei bad shynrang.
Ïa kane ka lympung la wan ban plie da u Bah Finely L. Pariat, General Secretary ka Meghalaya State Olympic Association (MSOA) kum u kongsan ha kaba la ïadon lang u Bah Gordon S. Langstieh, Functional Manager jong ka DCIC kum u symbud kongsan, u Bah Bobby L. Nongbet, District Sports Officer ka Ri Bhoi, ki nongïalam ka Ri Bhoi District Sports Association bad kiwei kiwei de.
Na ka liang u Bah Finely haba kren ha kane ka sngi u ai ka jingïaroh ïa ka shlem treikam u DSO kaba la pynlong ïa kum kane ka lympung ïalehkai na ka bynta ban sei ïa ki samla ïalehkai bad ban long ruh kum ka rynsan ban jan sha kiwei ki lympung ba kham shalor.
U la ai jingïaroh ruh ïa ka sorkar kaba la shimkhia ban kyntiew ïa ki kam ïalehkai sports ha ka Jylla bad katto katne ki khun samla ki la ïoh ruh ki baibam ne scholarship na ka Sorkar kum ka jingkyrshan ïa ki, bad khmih lynti ba lyngba kum kine ki lympung kan long ka jingplie lad ïa ki khun samla ha ka kam ïalehkai.
Lah ban pynkynmaw ba ki nongjop ha kane ka lympung kin shah jied ban mihkhmat ïa kane ka district sha ka State Level Inter School Athletics Meet ka ban sa long shen ha ka nongbah Shillong.
