Bengaluru, Jymmang:
U MLA ka Holenarasipur jong ka seng JD(S) uba la 66 snem ka rta u HD Revanna, u la shah set ha along na ka bynta ka jingtohkit haduh ka 14 tarik, Jymmang ha kaba ïadei bad ka jingrahbor bad ka jingleh beijot ïa kawei ka lanot kaba la buh jingujor pyrshah ïa u ha thanat KR Nagar ha Mysuru.
Ha kaba ïadei bad kane, ïa ka jingkyrpad jamin jong une u MLA ha Special Court for Elected Representatives la buh ban bishar kham hadien. Ki heh ka kynhun SIT ki la ïalam ïa u Revanna hakhmat ka 17th ACMM Court ha ka por shiteng sngi jong ka Sngi Balang hadien ba la kut noh ka jingshah set jong u kaba hashwa.
U Judge Ravindrakumar B Kattimani hadien kane u la dawa ba u MLA un shah set hynñiew sngi ha along na ka bynta ka jingtohkit.
U Revanna u la shah pynkynriah sha ka Parappana Agrahara Central Prison. U heh nongïasaid aiñ u CV Nagesh u la mihkhmat na ka bynta u MLA.
Ka jingmudui ha kaba ïadei bad ka jingshah rahbor ha kaba nyngkong la mudui pyrshah ïa u MLA bad ïa ki bahaïing jong u da u khun jong ka lanot uba la 20 snem ka rta ha ka 2 tarik, Jymmang ha thanat KR Nagar kaba don ha Mysuru distrik.
U Revanna u la shahkem ha kaba ïadei bad kane ka jingjia ha ka janmiet jong ka sngi Saitjaiñ ha ki heh jong ka kynhun SIT na ka jaka sah jong ka para jong u kaba don ha Padmanabhanagar ha Bengaluru. U la shah ïalam hakhmat u nongbishar ha ka Sngi U Blei.
U nongbishar u la phah set lai sngi ïa u MLA na ka bynta ban pynlong ïa ka jingtohkit kaba la long haduh ka Sngi Balang.
Ha shwa ba ka kynhun SIT kan ïalam ïa u sha ka ïingbishar, u MLA u la shah ïalam shwa sha Victoria Hospital hadien ba u la ud shitom na ka bynta ki jingshah sumar.
