New Delhi, Jymmang:
Ki la don baroh kumba khyndai ngut ki briew, kynthup ïa arngut ki doktor, kiba la shahkem ha ka kynhun Central Bureau of Investigation (CBI) ha ka sngi Balang ha kaba la ong ba kane ka long ka jinglah ban pynpulom ïa ka kam sniew ha Ram Manohar Lohia (RML) Hospital kaba don ha Delhi.
Kito kiba la shahkem ki la shah kynnoh ba ki la donkti ha ka kam bamsap da kaba bam tyngka na ki nongpang bad ki nongsumar. Ki arngut ki doktor kiba la shahkem ki dei kiba la tip kyrteng kum u Parvathgouda, Assistant Professor, Cardiology Department bad u Ajay Raj, Professor, Cardiology Department. Kine baroh arngut ki la trei ha RML Hospital bad ki la shah pynshisha ba ki la shahkem ha ka por ba ki dang bam tyngka.
Napdeng ki 7 ngut kiwei pat kiba la shahkem, ïa uwei napdeng jong ki la tip kyrteng kum u Rajnish Kumar, uba long u Senior Lab in-charge ha ka hospital ba la pynïaid da ka sorkar.
