Guwahati, Jymmang:
Ha ka jingïatreilang, ki pulit bad ki shipai hapoh ka jingïalam jong u OC ka Doomdooma u Manoranjan Saikia, la ïoh ban kem ïa u nongkhaïi tiar siat na ka shnong Uchamati jong ka Doomdooma ha ka miet jong ka sngi Ba-ar ha kaba la ïoh ban kurup ïa ka suloi ba la shna ha USA ha ryngkat 12 song ki kuli ki bym pat pyndonkam.
Kumba la ïathuh ka tyllong khubor, la ong ba hadien ba la ïoh jingtip halor kane ka jingdon jong une u briew, ka la don ka kynhun ba la ïatreilang hapdeng ki shipai ïada bad ki pulit ha kaba ki la ïoh ban kem ïa uwei u briew ba la tip kyrteng kum u Dhan Borah, uba dei u khun jong u Girin Borah jong ka shnong Kordoiguri Borgorah na jingkieng Uchamati.
Une uba la shah pynshisha ba u la don ha ka lynti ban leit sha Doomdooma na Tinsukia na ka bynta bna leit die ïa ki tiar siat bad une u dei ruh u dkhot barim jong ka kynhun lehnoh ULFA.
