Shillong, Jymmang 09
Ka shlem treikam jong ka District Sports Officer (DSO) East Jaiñtia Hills ka la pynbna ba shen kan pynlong ïa ka lympung ïalehkai District Level Subroto Cup Football Tournament 2024 ha Khliehriat.
Ïa kane ka lympung yn phiah ha ki lai tylli ki kyrdan ïalehkai kata ka U-15 ki shynrang, katba ha Under-17 jong ki kynthei bad shynrang.
Kane ka shlem ai jinghikai ka la wer ïa ki skul kiba na katei ka district ban ki wan ïashim bynta ha katei ka lympung bad ba kin wan shim ïa ki form na katei ka shlem trei kam ha ka por long trei. Ka tarik kaba khatduh ban pdiang ïa ki form kan long ha ka 3 tarik u Jylliew.
Kat kum ka jingpyllait da kane ka shlem treikam la ong ba ki khynnah kiba lah ban ïashim bynta ha ka U-15 ki dei ban long kiba la kha hadien ka 1 tarik u Kyllalyngkot 2010, katba ki khynnah ki ban ïashim bynta ha ka Under-17 ki ban long kiba la kha ha ka 1 tarik u Kyllalyngkot 2008.
Lah ban pynkynmaw ba ki skul kiba la ïoh ban mihkhmat ïa katei ka district sha ka State Level kaba la long mynshem snem ki long ka K.B Memorial Secondary School East ha ka U-14, katba ka Rymbai Presbyterian Higher Secondary School ha ka U-17 ki shynrang bad ka Khliehriat Higher Secondary School ha ka U-17 ki kynthei.
