Kohima, Jymmang:
Ka seng National People’s Party (NPP) ha Phek distrik ka la buh ïa ka jingkyrpad ïa ka National Highways and Infrastructure Development Corporation Limited (NHIDCL) ba kan pyntreikam shwa ha kaba ïadei bad ka surok Kohima-Jessami.
Ka seng ha kajingïakren bad ki nongthoh khubor, ka la kdew shai ha kaba ïadei bad ka jingsniew jong ka surok hapdeng ka Chakhaba bad ka Kikruma, kaba long u bud lum na ka bynta ka Phek distrik bad kiba bun kiwei pat ki bynta jong ka jylla. Ka seng NPP ha kane ka distrik ka la sngewkhia bha ha kaba ïadei bad ka jingbym don ki jingtrei na ka bynta ka jingshna surok, wat lada ïa ka projek la aiti sha ka M/s Ratna Infra Projects Private Limited, ha kaba ka jingbuh por ban sdang ïa pyntreikam ka la long na ka bynta ka 5 tarik, Kyllalyngkot, 2024 ha kaba kane ka la kut. Ka seng ka la khot ïa ki kontraktor na ka bynta ban phah sdang noh kham kloi ïa ka jingpyntreikam ïa kane ka surok khnang ban lait na ka jingsahteng.
Hashwa kane, kata ha u bnai, Ïaïong, u ADC Mangkolemba, T Lankosen Tsanglao, u la phah da ka shithi sha ki trai jaka kiba sah ha shi lynter jong kane ka surok naduh T.A Kubzar Petrol Pump kaba ha Mangkolemba shaduh lad Mangko. Kane ka jingphah shithi ka long ban hukum ïa ki ba ki la dei ban weng bad pynkhuid ïa ki jingdon jingem ne ki jingshna kiba don hapoh ka Right of Way (ROW) kum shi bynta ban sdang ïa ka jingpyntreikam jong ka jingshna ïa ka surok jong ka Longnak-Mangkolemba, kaba don ha Mokokchung, kaba hap hapoh ka jingkhmih jong ka NESIDS. Kumba la sakhi, la ong ba ka jingpynjlan ïa ka tarik na ka bynta ban sdang ïa ka jingpyntreikam kaba la long na ka bynta ka 5 tarik, Jymmang, 2024 ruh ka la kut ha kaba na ka liang ka seng ka la kyntu ïa ki bor ba dei khmih ba ki la dei ban shimkhia halor kane ka jingpyntreikam noh ïa kane ka surok.
