Shillong, Jymmang 10
Ka Bayer Leverkusen ka la lah ban pynthikna hakhmat ki paidbah nongkyrshan na ka bynta ban ïoh rung sha ka final ha ka UEFA Europa League 2023-24, hadien ba ka la ban pynïakhaid mar 2-2 kol ha ka jingïakhun pyrshah ïa ka AS Roma ha ka semi-final (second-leg).
Hadien ka jingjop da 2-0 kol ha ka wat kaba nyngkong, ka Leverkusen ka la shah tam da 2-0 kol lyngba ki ar tylli ki penalty ba la shut da u Leandro Paredes. Hynrei ha kaba kut ka la lah ban pynïakhaid kylla na ka bynta ban khur ïa ka jingjop.
Kumba ka paw na kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol. Dei hashwa ban kut ka jingïalehkai jong ka kylla step ba ka Roma ka la ïoh ban pynkhih jar nyngkong eh lyngba ka penalty ba la shut da u Leandro ha ka minit kaba 44. Une u rangïalehkai u la pynbud biang sa ka penalty tang hadien katto katne por ba la bteng ïa ka kylla miet ha ka minit kaba 66 na ka bynta ban tam 2-0 kol.
Hapdeng kane ka jingshah thep ar kol, pynban ki rangïalehkai ka Lever-kusen kim shym la duh jingkyrmen ha kaba ka la ïakhun tyngeh bad dei ha ka minit kaba 82 ba ka la lah ban pynphai kylla shi kol na ka daw ka jingbakla thep hi da u rangïalehkai ka Roma u Gianluca Mancini.
Kane ka shi kol ka la nangpynïoh mynsiem ïa kane ka kynhun bad dei ha ka minit kaba 97 ba ka la ïoh ban thep biang sa shi kol lyngba u Josip Stanisic (97) na ka bynta ban pynlong ïa kane ka kynhun ïalehkai kaba na Germany ban tam da 4-2 ha ka aggregate.
Lyngba kane ka jingjop ka Leverkusen kan pyn-khreh ban ïaknieh ïa ka nam lahduh ha ka jingïa -khun final ka ban long ha ka 23 tarik mynta u bnai ha Aviva Stadium kaba ha Dublin pyrshah ïa ka Ata-lanta, kaba la jop da 3-0 kol ïa ka Marceille ha kawei pat ka jingïakhun semi final.
