Shillong, Jymmang 10
U Project Director ka DRDA Ri Bhoi District, Bah Raja Brahma u la ong ba lada dei ha ka ri India ne ha Meghalaya ka kyrteng ba kham paw bha ka dei ïa kiba seng kam lajong ban ïa kiba treikam sorkar ne wat ka kyrdan Indian Administrative Services (IAS).
U Bah Raja u la kren ïa kine ki kyntien ban pynshlur ïa ki samla ba ki dei ban seng kam lajong ym ban ïa beh wad kam sorkar ha ka jingïalang pynskhem ïa ki nongkitkam ka Meghalaya Filmmakers Association Ri Bhoi District Unit kaba la long ha ka Sngi Thohdieng ha Nongpoh.
“Hangno phin lap ïa ka kyrteng u IAS ha ka ri India ba un pawnam hynrei ka kyrteng jong u Ambani uba dei u trai ka Reliance ka paw bha namar u dei uba seng kam lajong, kumjuh ruh ha Meghalaya ka kyrteng u Bah Mo uba don ïa ka jaka die kali Mahindra kane ruh ka pawbha” u la ong.
Nalor nangta, u la ong ba kiba treikam sorkar ka long kaba suk namar ki lah ban wan ha ka por 11 baje mynstep ki leit thik katkum ka por, nangta lada slap ne ïap briew ne ki pang ki lah ban shim shuti hynrei ka tulop haba kut bnai ki ïoh beit katba kiba seng kam lajong ki hap ban trei shitom.
U la ai nuksa katno ka jingduhnong ïa u trai jong ka phlim lada u la pynbeit ban ringdur lada don na kiba ak ki pep noh haba la dep pynkhreh-pynkhrum.
Namar kata, u la ong ba baroh ki briew ki kwah beit ïa ka kam sorkar namar ki la tip lypa ka dei kaba suk, hynrei kim pawnam pat kumba pawnam kiba seng kam lajong.
Ha kane ka sngi la ïoh jingkren na u Bah Commander Shangpliang u President ka Meghalaya Filmmakers Association, u Bah Banbuhai Makdok uba dei u Chairman ka Synjuk Rangbah Shnong Ri Bhoi District ha ka jingïadonlang ki nongak phlim, ki nongrwai, ki nongshad bad kiba shah khot sngewbha.
Ki nongkitkam ka Meghalaya Filmmakers Association Ri Bhoi District Unit la bat President da u Bah Lansius Syiemlieh, u Jemberson Marak kum u Secretary bad palat 60 ngut ki dkhot ba la pynskhem da u Bah Commander Shangpliang kum u President ka Meghalaya Filmmaker Association Sengkmie.
Ha kane ka sngi u Bah Raja Brahma u la ïoh ruh ban pyllait ïa ka ‘poster’ jong ka phlim ‘Tyrha’ kaba dang ap pali mynta ban pyni ha Bijou Cinema, Shillong.
