Shillong, Jymmang 10
Ka jingïaid lynti ka Manika Batra ha ka Saudi Smash 2024 ka la poi sha kaba kut hadien ba ka la mad ïa ka jingshah rem ha ka ‘thei ïalehkai kaba bat ïa ka kyrdan basan ha ka pyrthei ka Hina Hayata ha ka quarter final kaba la long ha Jeddah.
Ha kane ka jingïakhun ka Hayata kaba na Japan ka la lah ban pynliem noh ïa ka Manika kaba don ha ka kyrdan ba 39 ha ka pyrthei da 4-1 (7-11, 11-6, 11-4, 13-11, 11-2) ha ki 39 minit na ka bynta ban jam sha ka semi final.
Kumba ka paw katei ka nongïalehkai jong ka ri ka la sdang da ka jingjop kaba 3-0 (11-6, 13-11, 11-8) pyrshah ïa ka nongïalehkai kaba na Romania ka Andreea Dragoman. Hadien ka la lah ban pynliem ïa ka nongïalehkai kaba na China ka Wang Manyu, kaba bat ïa ka kyrdan ba-ar ha ka pyrthei, da 3-1 (6-11, 11-5, 11-7, 12-10) ha ka wat kaba ar hashwa ba kan pynliem sa ïa ka nongïalehkai kaba bat ïa ka kyrdan ba 14 ha ka pyrthei ka Nina Mittelham kaba na Germany da 3-0 (11-6, 11-9, 11-7) ha ka pre-quarter final.
Dangshen ka Manika ka la shah rem ha ka nongïalehkai kaba kynsai ka Sreeja Akula, hynrei kane ka nongïalehkai kaba khur ïa ka takma ksiar ha ka Commonwealth Games 2018 ka la khmih lynti ban long kum ka nongïalehkai ka ban bat ïa ka kyrdan ba nyngkong hapoh ka ri hadien ba ka la lah ban khur ïa ka jingjop ha Jeddah.
