Sao Paulo, Jymmang:
Katkum ka jingkheiñ na ka kaiphod ba la ioh lum na ka jingshlei um ha Brazil, la ong ba ki don palat 100 ngut ki briew kiba la khlad na katei ka jingshlei um bad palat 1,00,000 tylli ki iing briew ki la julor bad shah rat ha katei ka um namar ka jingther jong u ‘lapbah la palat shi taiew ha ka thaiñ Shathie jong ka nongbah Rio Grande do Sul jong ka Brazil ha kane ka taiew ba la leit.
Ka National Confederation of Municipalities ha ka kaiphod ba ka la pyllait thymmai ha ka Sngi Balang, ka la ong ba ka jingshlei um ha katei ka ri ka la ktah ia palat 1.45 Million ngut ki nongshong shnong bad kaba la pynlong ia ki 2,00,000 tam ki briew ba kin hap ban phet bad ieh noh syndon wat ia ki iing ki sem namar ka jingsniew palat ka jinglong-jingman ha kine ki taiew ba la leit.
Katkum ka kaiphod na ka Civil Defense pat, la ong ba ki don 99,800 ki iing briew kiba la julor bad shah rah ha katei ka um kaba la lang bad shlei naduh ba u ‘lapbah u la sdang ban ther ia katei ka ri naduh ka 29 tarik u Iaiong haduh ki taiew ba sdang jong une u Jymmang.
