Mumbai, Jymmang:
Ka Bombay High Court ka la kyntait ïa ki ar tylli ki jingpynibor lyngba ka Public Interest Litigations (PILs) halor ka rai jong ka sorkar Maharashtra na ka bynta ban pynkylla kyrteng ïa ka Aurangabad bad ka Osmanabad kum ka Chhatrapati Sambhaji Nagar bad ka Dharashiv.
Ha ka Sngi Balang, ka kynhun nongbishar jong u Chief Justice u DK Upadhyaya bad u Justice Arif Doctor, ki la ong ba ka rai jong ka sorkar jylla kam shym la shah ktah na ka jingdkoh treikam ne ha kiwei pat, bad namar kata kam shym la maham halor ka jingtuklar jong ka ïingbishar.
Ki nongshong shnong jong ka Aurangabad ki la leit mih hakhmat ka High Cout ha ryngkat ka PIL, ban pynibor halor ka rai ba la ai ha ka 16 tarik, Naitung, 2023 na ka bynta ban pynkylla kyrteng ïa ka nongbah.
Ka jingkyrpad ka la batai ba ïa ka nongbah la jer kyrteng kum ka Aurangabad ha ka por jong ka jingsynshar u Aurangzeb ha ka Mughal Emperor bad la shu pdiang da ki nongshong shnong haduh mynta.
Ki nongmudui ki la pynshisha da kaba ong ba ka jingthmu ban pynkylla kyrteng ïa ka nongbah ka long halor ka jingmut jngai hapdeng ki seng saiñ pyrthei ban wanrah ka jingïapait bad ban pynduh pyndam noh ïa ka pateng jong ki Muslim bad ka kolshor kaba ïadei bad kane ka nongbah.
Ka jingmudui ka la ong ba ka jingthmu ban pynkylla kyrteng sha ka Sambhaji Nagar ha ka por ba la leit ka la shah pynduh noh ha u snem 2001.
Ïa ka jingkyrpad PIL, la mudui da u Mohammed Mustaq Ahmed, u Annasaheb Khandare, bad u Rajesh More lyngba ka Judicare Law Associates, ha kaba la ong ba ki nongmudu ki la pyrshah halor ka jingpynkylla kyrteng ïa ka nongbah na ka Aurangabad sha ka Sambhajinagar naduh u snem 1995haba ka sorkar jylla ha kaba nyng-kong la ïakren na ka bynta ban pynkylla kyrteng ïa ka nongbah.
Ka jingmudui ka la ong shuh shuh ba wat lada ïa ka kyrteng jong ka nongbah hashwa la pynkyrteng da ka Khirki bad hadien la pynkylla pat sha ka Khujista Buniyad ha ka por jong ka jingsynshar jong u Shah Jahan, ïa ka kyrteng Aurangabad la jer bad pdiang ha ka por jong ka jingsynshar jong u Aurangzeb.
