Washington, Jymmang:
Ki pulit ka nongbah Washington jong ka United States ha ka Sngi Balang ki la leit ban kem ia katto-katne kiba pynshit ia ka jingiakhih paidbah hapoh ka jaka pule kaba don ha katei ka nongbah ban pyrshah ia ka thma Israel bad Hamas bad kiba la dawa ruh ia ka US ba ka dei ban leh eiei noh ban pynkut ia ka thma jong namar ka jingshah ktah jur jong ki paidbah nongshong shnong ka Gaza .
La ong ba ha katei ka step, da ki spah ngut ki pulit ki la leit ban poi sha katei ka jaka pule ha ka por kumba 4 baje mynstep ban leit kem ia kitei ki nongïakhih kiba don ha ka phyllaw jong katei ka jaka pule. La iathuh ruh ba ki la don kumba 30 tam kiba la shah kem na katei ka jaka bad shah rah noh ha ki pulit ha katei ka step.
Hynrei, la ong ba ki pulit ki dang ap pahara hi ia katei ka jaka haduh ka por kumba 10 baje mynstep ioh kin don sa kiwei pat ki ban leit ban bteng ia ka jingiakhih ha katei ka jaka.
Haba iadei bad kane, ki pulit ki la iathuh ba na kaba sdang ki la pyrshang ban maham ia kitei ki paidbah ba ki dei ban mih noh na katei ka jaka bad ban sangeh noh shi syndon ia ka jing-iakhih. Hynrei la ong ba ki paidbah kim shym pynsngap ia ka jingmaham jong ka tnat pulit bad kumta kane ka la pynlong ia ki pulit ban shim ia ka rai kaba eh da ka bor namar ka jingbym pynsngap jong kitei ki nongïakhih wat haba la dep ban maham shuwa.
Namar la ong ba ki paidbah ki la leit ban pynlong jingialang ha kylleng ki jaka pule bad ki skul bah jong ki nongbah bahper ka United States ban pyrshah jur halor ka jingleit hiar thma jong ka Israel pyrshah ia ka nongbah Gaza kaba la synshar hi da ki lehnoh Hamas mynta da ki phew snem.
Hynrei ka jingiakhih jongki ka long ban pynsangeh noh ia ka thma namar ka jing shah jynjar bad jingshah ktah jur jong ki paidbah nongshong shnong ka Gaza.
