Washington, Jymmang:
Ha kane ka khubor ba sngewsih la ong ba uwei u doh-iong uba long u heh jong ka tnat shipai suiñ ka US, u la shah siat iap ei na ka jingbakla jong ki shipai US ban leit rung bad synreit kuli ha ka jaka ka bym dei bad kaba don marjan bad ka iing kaba ki thmu ban leit rung bad khynra ha katei ka Sngi Palei. Kane ka la jia hapoh ka nongbah Florida jong ka United States.
Kumta, u heh ka tnat ‘Civil Rights’- u Ben Crump, uba ïeng na ka bynta ka hok jong ki doh-iong kiba la long ki nongshong shnong ka America, ha katei ka sngi u la pynpaw ka jingsngewkhia haba jur haba iadei bad katei ka jingjia bad ha kajuh ruh ka por u la dawa ia ki bor pyniaid bad ki tnat tohkit ba kin wad bniah halor katei ka jingshah siat iap u doh iong nong America ha ka 3 tarik jong une u Jymmang.
La ong ruh ba ki heh ka Okaloosa County ki la shim khia ban phah tohkit bad wad bniah halor katei ka jingjia namar kiba bun ruh ki doh-iong ki ju shah thombor bad shah pyni bor ha ki doh-lieh kiba don ha katei ka ri America namar ka jing-ibeiñ jaitbynriew kaba don ha ki katto katne ki nong America bad kiba ialeh ban pynher krad ia ki nongwei kiba leit rung bad shong ha katei ka ri jong ki.
La ong ba ki bor pyniaid ka Okaloosa County ki la pyni ia kawei ka dur-khih ba la ioh ring lyngba jong ki camera CCTV kiba la pyndait ha katei ka kamra ba utei u heh ka tnat liengsuiñ jong ka US- u Airman Roger Fortson u la shah siat ha kitei ki pulit ka US kiba leit ban khynra ha katei ka jaka ka bym dei ka jaka ba ki thmu ban leit rung.
Hynrei, ki heh pulit katei ka nongbah ki la iathuh ba ka jaka ba ki la bthah ia ki pulit ban leit poi kam dei ha katei ka jaka ba don utei u heh pulit doh-iong.
U Crump u la ong ba katei ka jaka sah jong utei u heh pulit ka dei ka jaka sah shimet jong u, kaba u don hok bad u long trai ban shong- ban sah. Hynrei kitei ki pulit ki la shu leit rung jubor shapoh katei ka jaka sah jong u bad ki la siat syndon ia u khlem da wad bniah ne peit thuh shwa ia ka jinglong-jingman ha katei ka jaka.
U Crump u la iathuh ba utei u heh pulit doh-iong u dang don 23 snem ka rta.
La ong ba utei u heh pulit u dang iakren phone lyngba ka dur-khih bad ka samla jong u ha katei ka por ba ki pulit ki leit ban khynra ia ka iingsah jong u, ha kaba ka la iathuh ba katba ka dang iakren phone bad utei u heh pulit ha katei ka sngi, kynsan ka la ïohsngew ia ka jingshah kyndar ka jingkhang bad utei u doh-iong u la kylli ba ki dei mano, hynrei la ong ba kim shym la jubab eiei. Hadien kata, utei u pulit u la shim ia ka suloi kaba dei ka jong u hi ban leit peit ioh ki dei ki runar kiba thmu ban leit thombor ia u hapoh ka jaka sah jong u, hynrei tang mar kumta hi ka la iathuh ba ka ïohsngew ia ka jingriew ki ktang suloi haduh 6 sien bad ka la sngewthuh ba utei u pulit u la shah siat namar um shym leit phai shuh sha ka jingiakren phone bad ka watla um pat shym la pynlip ne pynkut ia ka jingiakren.
Namarkata, u Crump u la dawa ba ka tnat tohkit bad ka tnat wad bniah ka dei ban shim ka jingkit khlieh bad ban shim khia ruh ban wad ia ka daw jong ka jingshah siat jong utei u heh pulit watla na ka liang kitei ki pulit kiba leit ban khynra ki la phla ba ka dei tang ka jingbakla ba ki leit rung ha ka iing ka bym dei.
