Shillong, Jymmang 10
Ka lahduh jong ka aïom ba la dep, ka Mawlai SC ka long ba la khreh ban bat biang ïa ka nam lahduh ha ka lympung ïalehkai ka Shillong Premier League 2023 namar kan ïakhun pyrshah ïa ka Rangdajied United FC ha ka jingïakhun final ka ban long mynta ka sngi Saitjaiñ ha SSA Stadium kaba ha First Ground, Polo ha ka por 3 baje janmiet.
Shi sngi shwa ban sdang kane ka jingïakhun phainal, la ïoh ban ïakren bad ki nongïakit nongïabah ïa kine ki artylli ki klob katta u Bah Eskial S. Mon ba dei u Jt. Secretary bad u Jerry A Sutnga, Asst Coach ka Mawlai Sports Club bad kumjuh u Aibanjop Shadap Head Coach ka Rangdajied United FC.
Haba phai sha ka Mawlai SC hapoh ka jingïalang u Bah Hering Shangpliang, ka don ka khubor kaba pynkyndeh mynsiem ïa ki paid nongkyrshan hadien ba ki bor ba khmih ki la pynpaw ba don lai ngut ki nongïalehkai kiba kham kynsai ha ka kynhun kiba don hapdeng ka jingartatien ban don ha ka First XI namar ki don hapdeng ka jingshitom.
Kine lai ngut ki kynthup ïa u Remark Kharmalki u bym shym la lah ban ïalehkai jan baroh shi samoi ïalehkai ba mynta, bud pat sa u Donlad Diengdoh bad u Raikutshisha Buam.
Hynrei, wat la katta ki bor ba dei khmih katei ka klob ki la pynpaw ba kane kan ym don than ka jingktah ïa ka kynhun hi baroh kawei, katno tam lei lei hadien ba ki rangïalehkai ki la lah ban pynpaw ïa ka jinglong kaba la ih bad tbit bha ha ka liang ka rukom ïalehkai ka jong ki bad ka nuksa jong kane ka paw tyngkreiñ mynba ki la ïakhun pyrshah ïa ka Langsning FC ha ka semi-final.
Na ka liang u Aibanjop Shadap (Coach) u pynpaw ba ka Rangdajied ka biang lut baroh ki rangïalehkai na ka bynta ban ïakhun ïa ka phainal, ha kaba ym don wat tang uwei ruh ban ong ba un ud pang ne shitom. Kane hi ka long ka dak jong ka jingkyrmen ïa kane kawei ka klob kaba wat la ka dei ka lahduh ha ka Jylla, hynrei ka thrang bad ka sliang dik-dik ka mynsiem na ka bynta ban ïoh ban piam ha la ki jong ki ksang kti ïa ka trophy nam lahduh.
Kumba ka paw haduh kaba kut jong ka round robin, ka RUFC ka la lah ba kan ïoh khur 18 point na ki 7 sien ïakhun, katba ka Mawlai SC ka la ïoh ba kan khur 16 point, bad ha ka por ba ïakhun ïa ka semifinal ka RUFC ka la lah ba kan pynliem da 1-0 kol ïa ka Shillong Lajong FC, katba ka Mawlai SC ka la jop da 2-1 ïa ka Langsning FC.
