Shillong, Jymmang 12
Tang hadien katto katne sngi ba ka la ïoh ban buh jaka ha ka final jong ka lympung Champions League, ka Borussia Dortmund ka la shah pynliem noh da 3-0 kol ha ka jingïakhun pyrshah ïa ka Mainz ha Mewa Arena ha ka lympung Bundesliga.
Kane ka jingjop ka la pynlong pat ïa ka Mainz 05 ba kan kiew sha ka kyrdan kaba 15 ha ka miej ïakheiñ point bad ban mih shabar na u laiñ jong ka jingdon ha ka jingma ban hap ïakhun ban lait na ka jingshah pynhiar kyrdan ha ka samoi ban wan.
Katba ka Borussia Dortmund pat ka dang don ha ka kyrdan kaba 5, kata hadien ba ka la ïoh khur 60 point na ki 33 tylli ki jingïakhun.
Ka Dortmund kan ïakhun khatduh pyrshah ïa ka Darmstadt ha Signal Iduna Park ha ka sngi Saitjaiñ ban wan ha ka lympung Bundesliga jong kane ka aiom shwa ba kan ïakhun pat ïa ka Real Madrid ha ka final ka Champions League ka ban long ha Wembley ha ka 1 tarik u bnai Jylliew.
