Shillong, Jymmang 12
Ka Meghalaya ka la mad ïa ka jingshah rem kput ha ka sngi sdang ïa ka jingïalehkai ha ka lympung U-20 Men’s National Football Championship kaba la long ha Narainpur, Chhattisgarh ha ka sngi U Blei.
Haba phai sha kane ka jingïalehkai kaba nyngkong jong kane ka lympung, ka Meghalaya kaba don ha ka Group-F ka la shah pynliem haduh 5-0 kol hakhmat ka Mizoram.
Ha kane ka jingïalehkai, u Lalthankima uba la ïoh ban khyrwit ïa ka hat-trick, u la ïoh ban khyrwit shwa ar tylli ki kol ha ka minit ba 26 bad 33 bad ban pyntam ïa ka Mizoram da 2-0 kol haduh ba kut jong kylla step.
Wat la na ka liang u Coach ka Meghalaya u Bah Jeffrey Warlarpih u la pynmih bujli haduh ar ngut ki rangïalehkai ha ka kylla step hynrei kane kam shym la lah ban wanrah ïa u soh namar tang ha ka minit kaba 47 jong ka kylla miet, u Lalthankima u la khyrwit syndon ïa ka kol kaba lai bad ha ka minit kaba 54 pat u Lalngaihsaka u la khyrwit ïa ka kol kaba saw bad ha ka minit ba 83 u C Zomuanpuia u la ïoh ban khyrwit ïa ka kol kaba san kaba la biang pura ïa ka Mizoram ban ïoh ka jingsdang kaba paka ha kane ka lympung.
Kane ka lympung ïalehkai ïa kaba la ai ha ka kyrteng jong u Swami Vivekananda, ka dei kaba la sdang naduh u bnai Ïaïong. Ka jingpynlong ha ki kyrdan bapher bapher ka long ban lah ban ailad lut ïa baroh ki jingïalehkai ban pynlong beit ha kawei ka madan. Ha kane ka lympung ki don baroh 32 tylli ki jylla kiba la ïashim bynta bad ïa ka final jong kane ka lympung la buh ban pynlong ha ka 22 tarik mynta u bnai.
Ka Meghalaya ka la don lypa mynta ha ka jingeh ban dang lah ban jam shakhmat namar tang ka Top Team na kawei kawei ka group kan ïoh rung sha ka quarter-final. Hadien kane ka jingshah rem, ka Meghalaya mynta kan pynkhreh ban ïakhun pyrshah ïa ka Rajasthan ka ban long ha ka sngi Ba-ar. Ka Rajasthan ruh ka la dep ban khur kawei ka jingjop, hadien ba ka la pynliem noh ïa ka Maharashtra da 2-1 kol ha ka jingïalehkai kaba la long ha ka step jong ka Sngi U Blei.
