Agartala, Jymmang:
Namar ka jingshah ktah jong kiba bun ki jingpyntreikam ha ka ban pynïaid ïa ki rel ha ka jylla ba shaphang Shatei Lam- Mihngi ha ki artaïew ba la leit namar ka jingdon jong ki jingtwa khyndew ha ki bynta jong ki lum ha Assam, u Myntri Rangbah jong ka jylla Tripura u Manik Saha u la buh ka jingkyrpad ïa u Myntri ka tnat Railway u Ashwini Vaishnaw ba un pynstet ha ka ban phah pyntreikam na ka bynta ki jingpynbha khnang ban lah ban pyntreikam biang ïa ka jingïaid lynti jong ki rel kumba ju long kynthup na ka bynta ki rel kit ïa ki nongleit jing-leit bad ki rel kit mar, lyngba ka Dima Hasao distrik kaba don ha Assam.
Kumba la ïathuh ka Northeast Frontier Railway (NFR), la ong ba ki rel kit ïa ki nongleit jingleit bad ki rel kit mar ki la shah ktah bha ha kane ka thaiñ naduh ka 25 tarik, Ïaïong na ka daw jong ka jingjur palat jong u slap kaba la wanrah ïa ki jingtwa khyndew ha ki lynti rel kaba la ktah jur ïa ka Dima Hasao distrik, kaba long ka lynti kaba la pynïasoh bad ka bynta ba shaphang Shathie jong ka Assam, Tripura, Manipur, bad Mizoram.
Ki heh sorkar ki la ong ba u Myntri Rangbah u la phah shithi sha u Myntri ka tnat Railway ha kaba la kyrpad ïa u ba u la dei ban phah pynbha biang ïa ki lynti rel kham kloi katba lah khnang ban sdang biang ïa ka jingpyntreikam jong ki rel kit ïa ki nongleit jingleit bad ki rel kit mar.
