Shillong, Jymmang 12
Ka Chennai Super Kings (CSK) ka la khur ïa ka jingjop kaba donkam tam ha ka lympung Indian Premier League (IPL) kaba dang ïaid shakhmat mynta ban pynskhem ïa la ka jaka ha ka ‘Top Four’ ban ïoh ïakhun pat ïa ka ‘Playoff’ na ka bynta ban poi sha ka thong ban ïaknieh nam lahduh.
Kane ka jingjop ka CSK ka la wan hadien ba ka la pynliem ïa ka Rajasthan Royals da 5 wiket ha ka jingïalehkai kaba la long ha ka sngi U Blei ha Chennai.
Haba phai sha ka jingïalehkai, ka Rajasthan kaba tied nyngkong, ka la kamai tang 141 run na ki 20 over bad hap 5 wiket. Kane ka jing-lah ka Chennai ban tehlakam ïa ka jingkamai run da ki nongtied ka Rajasthan, ka dei lyngba ka jinglah ban kawang bol bha da u Simarjeet Singh uba la khur 3 wiket na ki 4 over bad ai 26 run bad u Tushar Deshpande uba la khur 2 wiket bad ai tang 30 run na ki 4 over.
Dei tang u Riyan Parag uba la tied 47 run na ki 35 tylli ki bol lem u Yashasvi Jaiswal uba la tied 24 runbad u Jos Buttler uba la tied 21 run, ba ka Rajasthan ka sa lah ban buh ïa katei ka thong.
Watla ka long ka thong ka bym da heh bha hynrei ki nongtied ka Chennai ruh ki la kham shem shitom ban kamai suk ïa ki run na ka jinglah ban tehlakam ki nong-kawang bol ka Rajasthan, hynrei ha kaba kut, ki la lah ban pyndep na ki 18.2 over bad hap 5 wiket.
U Rituraj Gaikwad u la ïalam lynti da kaba tied 42 run na ki 41 tylli ki bol, kiwei kiba la synñiang lang ki long u Rachin Ravindra u la tied 27 run, u Daryl Mitchell u la tied 22 run, u Shivam Dube 18 run bad u Sameer Rizvi 15 run.
Ha kane ka jingïalehkai, u Simarjeet Singh uba la khur 3 wiket bad ai 26 run u la khur ruh ïa ka khusnam ‘Player of the Match’.
Lyngba kane ka jingjop, ka CSK ka la kamai 14 point na ki 13 tylli ki jingïalehkai bad kiew sha ka kyrdan kaba 3, katba ka Rajasthan Royals pat ka dang neh ha ka kyrdan kaba 2, hadien ba ka la khur 16 point na ki 12 tylli ki jingïalehkai.
