Shillong, Jymmang 12
Ka jingïakren hapdeng ka Sorkar Jylla bad ka Harijan Panchayat Committee (HPC) ban pyn-kynriah ïa kiba sah ha Them Metor ne Them Ïew Mawlong sha kawei pat ka jaka ka la poi artad sha kaba kut ban pynbeit noh, hynrei hapdeng ka jingïakren ban pynbeit ka don ruh ka jingsngew bynnud ïa ki jaka mane khamtam ki Gurudwara kiba la ïeng ha katei ka jaka.
Ka tyllong khubor ka ïathuh ba napdeng kiba bun ki jingïakren ha ka jingïakynduh kaba dang shen, kawei na ki jingsngew kiba la pynpaw da ka HPC ka dei ka jingdon ki jaka mane ha Them Ïew Mawlong kaba lada long kaba lah dei ban pynneh ïa ki ha kajuh ka jaka Ka don ka jingsngew bynnud ïa kine ki jaka mane naduh ka Ïingmane haduh ki Gurudwara kiba la tei bad ïeng mynta la bun phew snem ha katei ka jaka bad ba ki briew kiba shong kiba sah ruh ki la im mynta la bun pateng da ki spah snem naduh ka por jong ka Sorkar Phareng kaba wanrah ïa ki ban trei ki kam bapoh khamtam ban pynkhuid bad khat ïa ka jaboh jabaiñ kaba ym don mano-mano ba treh ban trei ïa kum kine ki kam kiba la kheiñ ki dei ki kam bapoh.
Hynrei la ong ba na ka liang ka Sorkar ka la dep pyni ha ka ‘blue print’ ba ka jingpynkynriah ka dei kaba kynthup lut lang hajuh ym tang ïa ki briew kiba sah ha katei ka jaka hynrei ïa ki jingtei jingshna ruh kiba hap pynpra.
Kumta ka HPC ka la pan por ban ïakren bad kiba shong ba sah ha katei ka jaka ban pynsngewthuh ïa ki khnang ba ka jingpynbeit kan long kaba ïaid beit.
Na ka liang ka Sorkar Jylla ka la ïeng skhem ba ka kwah ban pynkynriah ïa kiba shong ba sah ha Them Metor sha kawei pat ka jaka namar kane ka dei ka jingeh kaba la sahteng la slem ha kaba kiwei ki Sorkar ha ki por ba mynshwa ruh ki khlem ktah ïa kane ka mat.
Ka Sorkar ka la pynbeit ban ïakynduh khatduh ha ka 7 tarik u Jylliew bad ka HPC, bad ka kyrmen ba yn lah ban pynbeit noh shisyndon ïa kane ka jingeh.
