UN, Jymmang:
Ka United Nations ha ka Sngi Thohdieng ka la iathuh ba ka jingthmu pynpoi ia ki lad jingiarap sha Gaza Strip ka lah ban hap sangeh shuwa ha kine ki khyndiat sngi ki ban wan namar ka jingdon jong ki shipai ka Israel ha Rafah bad ka jingleit thombor jong ka Israel sha Rafah ka la pynthud ia ki kam- ki jam baroh ba katei ka tnat ka la thmu ban leh naka bynta ki paidbah nongshong shnong ka Gaza.
Namar la ong ba ki tup thma jong ka Israel ki la sop ia ki surok jong ka thaiñ East bad West jong ka nongbah Rafah, kumba ka Israel ka la thmu ban ker-kut ia katei ka nongbah baroh kawei bad ba kan ioh ban ther bom sha ki jaka ba shong ki dkhot ka kynhun lehnoh Hamas bad ba ki shipai jongka kin ioh ban synshar hi noh ia katei ka nongbah. Ha kajuh ruh ka por pat, la ong ba ka United States ka la hap ban pynsangeh noh haba iadei bad ka jing pynpoi ia ki tiar thma bad ki bom sha ka Israel namar ka la iohi ia ka jingthmu jong ka Israel ban leit thombor sha Rafah bad ban ioh synshar hi noh syndon ia katei ka nongbah Gaza.
Ki nongshong shnong ka Rafah ki la iathuh ba ha katei ka sngi ki la ïohsngew ia ka jingsawa ki ktang suloi bad ka jingbthei jong ki bom ha ki bynta khappud jong katei ka nongbah katba ki lehnoh Hamas ki dang iakhun pyrshah ia ki shipai ka Israel kiba leit ban tur sha katei ka phang ba don ki dkhot ka kynhun lehnoh Hamas.
Na ka liang jong ka Hamas pat, ka la pyntip ba ki dkhot jongka ki la ioh ban kerkut noh ia ki tup thma jong ka Israel kiba don hajan ka jakamane kaba sha ka phang East jong katei ka nongbah Rafah.
Namar la ong ba ka Israel ha kine ki khyndiat sngi, ka la dep bthah ia ki paidbah nongshong shnong jong ka Rafah ba kin mih noh na katei ka bynta bad kaba la pynlong ia ki phew hajar ngut ki paid nongshong shnong ba kin leit phet rieh shipor shabar jong katei ka nongbah tang ba kin lait na ki jingma jong ka thma.
Ka Israel ka la dep kren shai ruh ba kan ym lah ban jop ia katei ka thma jongka pyrshah ia ki lehnoh Hamas lada kam leit ban hiar thma ha Rafah namar kiba bun ki dkhot jong ka Hamas ki don ha katei ka bynta bad kumta ka Israel ka la rai ban leit hiar thma sha katei ka bynta ba khatduh jong ka nongbah Gaza khnang ba kan ioh ban knieh noh syndon ia ka bor synshar hapoh Gaza.
Kumta, ka United Nations ha katei ka Sngi Thohdieng ka la pynbna ba wat ki jingiarap kiba la mang naka bynta ki paidbah ka Gaza ruh ki la jan lut baroh bad ka umphniang bad ki bam- ki dih ruh ki la lut noh katba katei ka tnat ka dang pyrshang ban pyniaid ia kitei ki jingiarap sha ki paidbah ka Gaza mynta la bun sngi.
Ki tnat bapher jong ka pyrthei ki la ong ruh ba ka jingleit hiar thma jong ka Israel sha Rafah, ka la buh jingma shuh shuh ia kitei ki paidbah nong Palestine ha Gaza kiba la kylla phetwir tang namar ka jingleit hiar thma ba khlem sangeh jong ka Israel.
