Shillong, Jymmang 12
Ka jingthep ‘vote’ ban jied MP Lok Sabha ha ki lai bynta ha ki 283 tylli konstitwensi ha ki 20 tylli ki jylla ka khlem pat lah ban kot wat tang sha ka 70 na ka 100 (70 per cent) bad ki sah sa saw bynta jong ka ilekshon.
Katkum ki jingkheiñ jingdiah ba la pyllait da ka Election Commission jong ka Ri India (ECI), la ong ba ha ka bynta banyngkong jong ka ilekshon ha ki 102 tylli ki konstitwensi ba kynthup lang ïa ka Meghalaya, ka jingpoi ki nongthep ‘vote’ ka la long 66.14 na ka 100, katba ha ka bynta ba ar kaba la long na ka bynta ki 88 tylli konstitwensi, ka jingthep ‘vote’ ka la long 66.71 na ka 100.
Nalorkata, ka ECI ka la long ba ha ka bynta kaba lai jong ka ilekshon kaba la long ha ki 93 tylli konstitwensi, ka jingwan poi jong baroh ki nongthep ‘vote’ ka la long 65.68 na ka 100.
Kaba sah mynta ka long sa ka ilekshon ha ki 260 tylli konstitwensi ha ki saw bynta, bad ka bynta bakhatduh kan kut ha ka 1 tarik Jylliew katba ka jingñiew ‘vote’ kan long ha ka 4 tarik Jylliew.
Kum ban shu kyrtiang dien, ha ka ilekshon MP Lok Sabha kaba la long ha u snem 2019, ka jingpoi ki nongthep ‘vote’ baroh ha ki 543 tylli konstitwensi ka long 67.40 na ka 100.
