Mawkyrwat, Jymmang 12
Kum shibynta ban kyntiew ïa ka kam ïalehkai kriket ha ki district, ka Meghalaya Cricket Association (MCA) lyngba u President u Naba Bhattacharjee ha ryngkat ka jingdonlang u Bah Gideon Kharkongor, Secretary ka MCA, Bah Banteibor Lyngdoh, President SWKHD Cricket Association, Bah Bakhain Nongsiej, Secretary MCA lem ki dkhot, ha ka 11 tarik u Jymmang 2024 ka la ïoh ban plie ïa ka shlem ai jinghikai kriket ïa ki khynnah kiba hapoh 18 snem ha Banber, Mawten kaba ha South West Khasi Hills District.
Kum ban shu kdew ba hapoh kane ka shlem ai jinghikai, ka jingwan ki khynnah ban shah hikai ka la nang bun nang bun bad kumba long mynta na ka liang ki nongkitkam ka Association ki la ïathuh ruh ba ki la don haduh kumba 180 ngut ki khynnah kynthei bad shynrang kiba wan ban shah hikai ïalade hapoh kane ka Cricket Academy.
Ka jingplie ïa kane ka shlem ai jinghikai hapoh ka district kaba ïadei bad ka kam ïalehkai kriket lehse kan sa long kabu ksiar ïa ki khynnah jong kane ka dong ka thaiñ kiba sngwtynnad ïa kane ka jait jingïalehkai na ka bynta ban pyntbit ïalade.
U Naba Bhattacharjee haba ai jingkren ha kane ka sngi u la pynpaw ïa ka jingkmen kaba khraw ban ïohi ïa ki hep ki barit kiba ieit ïa ka jinglehkai kriket ha kaba da ki spah ngut ki la wan ban shah hikai ïalade ha kane ka shlem ai jinghikai.
U la ai ka jingïaroh ïa ki dkhot ka South West Khasi Hills District Cricket Association kiba la trei shitom ban kyntiew ïa ka kam ïehkai kriket hapoh ka District bad u kyrmen skhem ruh ba kumba kane ka district ka ju sei ïa ki ‘thei ïalehkai kiba tbit kiba la ïoh ban mihkhmat teng ïa ka jylla, ha ki snem ban wan lyngba ka jingdon jong kane Academy, kane ka District kan sa sei ki ‘rang bad ki ‘thei ïalehkai ba kynsai ki ban ïoh mihkhmat ha ki District level, State level bad National level.
U Naba Bhattacharjee u la kular ruh ha ki nongkitkam ka synjuk ba ïa ki khynnah kiba wan na ki longïing baduk kiba smat ban wan tista bad kiba don ka mynsiem ban kiew, na ka liang ka jong u, un sa ïarap pisa kyrpang nalade ym na ka MCA haduh kumba 25 ngut ki khynnah ïa ki tiar ïalehkai bad ruh ïa ki jaiñ ki juti.
