Imphal, Jymmang 12 (UNI)
U Myntri Rangbah ka Manipur, u N. Biren ha ka Sngi U Blei u la ong ba thma pohïing ha Myan-mar ka la pynsakma ïa bun bah ki briew, ha kawei ka liang kaba la pynlong ïa ki ban rung be-aiñ sha Manipur.
Haba kren sha ki lad pathai khubor ha CM Secretariat, u Biren u la ong ba la lap ïa kumba 5,801 ngut ki nongshong shnong kiba wan rung be-aiñ na Myanmar tang ha Kamjong District bad 15 ngut na ki, ki la ïap katba 359 ngut kiwei pat ki la leit phai sha Myan-mar.
Kumba ka long mynta, ki don 5,457 ngut ki nongshong shnong kiba la wan rung be-aiñ na Myanmar ha 8 tylli ki shnong ka Kamjong bad ki don ha ki jaka ba shngaiñ, u la ong.
Ka komiti shnong ka khmih bad pynbiang ïa ki jaka sah lem bad kiwei-kiwei ki jingpynbit jingpynbiang ha ryngkat ka rashon ba la pynbiang da ki bor distrik, u la ong.
Ki bor distrik ki la pynbiang ruh ïa ki ‘identity card’ sha kine ki briew bad ka don ruh ka jingñiew khlieh man la ka pud sngi, u la pyntip.
Wat la ki long kiba kloi ban leit phai sha Myanmar naba la sdang ka aïom rep, hynrei ki don ka jingartatien namar ka jingpynbthei ‘bomb’ ba dang shen na ka liang ki shipai Myanmar.
Tad naduh kata ka por, yn pynbiang bam bad jaka sah sha baroh kine, la ong u Myntri Rangbah.
U Biren u la ong ruh ba la thaw ïa ka kynhun pulit ba kyrpang ban pynithuh ïa ki jaka sah bathymmai, bad ban leh ïa ka ‘biometric’ jong kitei ki briew.
U la ïathuh la dep thung ïa ki Nodal Officer ha ki 5 distrik — Ukhrul, Kamjong, Tengnoupal, Chandel bad Churachandpur na bynta ban peitngor halor ka jingwan rung be-aiñ, ban pynithuh ïa ki jaka sah thymmai bad ban ïaid shakhmat bad ki ‘biometric’ ban buh ha rynsan ka MHA.
U la ong ba namar ki kam jong kitei ki briew, ka Manipur ka la sakhi ïa ka jingthut ha ka jinglong-jingman ka jingbun briew bad ka jingjulor ki khlaw, jingthung ‘poppy’, jingkhaïi drok ha ki jaka ba bun ki Kuki jong ka Churachandpur bad Kangpokpi.
Ïa kitei ki briew ba wan rung be-aiñ, yn sa pynphai biang noh da kaba bud ïa ki kyndon aiñ bad ka Sorkar kan pyntikna ïa ka jingïada ïa ki trai-ri bad ban peitngor ïa ka jingwan rung be-aiñ, u la bynrap.
