Shillong, Jymmang 12
Ka Mawlai Sport Club ka la ïoh ban rah biang ïa ka nam kum ka lahduh ha ka sien kaba ar kynthih, kata hadien ba ka la lah ban pynliem noh ïa ka Rangdajied United Football Club ha ka jingïalehkai final jong ka lympung Shillong Premier League (SPL) 2023 kaba la long ha ka Sngi Saitjaiñ ha madan SSA, Polo.
Kane ka jingïoh rah ïa ka nam lahduh ka la wan lyngba ka jingjop tang da 1-0 kol bad ïa kane ka kol kaba kordor tam na ka bynta ka Mawlai la ïoh ban thep da u Donlad Diengdoh ha ka minit kaba 26. Wat la ki rangïalehkai ka Rangdajied United ki la ïakhun tyngeh ban pynphai ïa kane ka kol hynrei kim shym la lah satia wat haduh kaba kut.
Kane ka jingïakhun ha kane ka sngi ka la long kaba shongshit bad itynnad khamtam lei lei da ka jingwan jong ki nongkyrshan na baroh arliang khamtam ki nongkyrshan ka Mawlai kiba la wan ha ryngkat ki lama stem ban pyndap smam ïa ka SSA Stadium.
Lah ruh ban pynkynmaw ba ka Rangdajied United ka la shah rem ruh ha ka final jong ka SPL jong u snem 2022 hakhmat ka Mawlai, kaba la ïoh rah ha ka sien ba nyng-kong eh ïa kane ka nam lahduh bad mynta ruh ka la pynliem biang ïa ka Rangdajied United ban rah ïa ka nam lahduh kaba ar sien kynthih jong kane ka lympung.
Lyngba ka jingjop bad rah ïa ka nam lahduh, ka Mawlai Sports Club ka la ïoh rah ïa ka song pisa kaba 3 lak tyngka lem bad ka Trophy lahduh kaba la sam da u Chief Secretary ka Jylla u Bah DP Wahlang kum u Kongsan, katba ka Rangdajied United pat ka la ïoh ïa ka song pisa ba 1.5 lak tyngka bad ka trophy ba la sam da u Chief Engineer ka State Sports Council Meghalaya u Bah BM Syiem.
Kiwei kiba la ïadon lang ha kane ka sngi ki kynthup ïa u President ka Meghalaya Football Association Bah Hamletson Dohling, u President ka Shillong Sports Association Bah Eugeneson Lyngdoh lem bad kiwei kiwei ki dkhot ba hakhmat ka SSA.
Ha kane ka lympung, u Donlad Diengdoh u la ïoh khyrwit haduh 6 kol bad ban don ha ka kyrdan kaba ar na ki nongthep kol bun eh, kata hadien u Deibormame Tongper ka Shillong Lajong FC uba la ïoh thep haduh 8 kol.
