Nongpoh, Jymmang 12
Ka St. Alfred Secondary School, Marngar ka la ïoh rah ïa ka nam lahduh jong ka lympung ïalehkai ki khynnah skul ka Ri Bhoi, ka District Level Inter School Athletics Meet 2024 kaba la pynïaid da ka shlem treikam u District Sports Officer (DSO) ka Ri Bhoi ha ka madan NSCA ha Pahamsyiem, Nongpoh.
Ïa kane ka lympung la pynhap pyrda ha ka Sngi Saitjaiñ da u Additional Deputy Commissioner ka Ri Bhoi u Raja Brahma kum u kongsan ha ka jingïalang u DSO, Bah Bobby L Nongbet, ka District School Educa-tion Officer ka Ri Bhoi Kong PL Nonglait lem bad kiwei kiwei.
Ka jingïoh rah jong ka skul St. Alfred Secondary School, Marngar ïa ka nam lahduh napdeng ki 30 tylli ki skul kiba la wan ban ïashim bynta ha kane ka lympung, ka long hadien ba ka la ïoh ban khur haduh 31 tylli ki takma ba kynthup 16 tylli ki takma ksiar, 9 tylli ki takma rupa bad 6 tylli ki takma rnong.
Ka kynhun ïalehkai jong ki khynnah ka St. Alfred Secondary School ka la ïoh ruh ban rah ïa ka nam Best Team ha ka kyrdan U-14 jong ki kynthei bad shynrang bad ruh ha ka kyrdan U-16 bad U-18 jong ki kynthei katba ïa ka kyrdan U-16 bad U-18 jong ki shynrang pat la ïoh ban rah da ka kynhun ïalehkai jong ka St. Paul Higher Secon dary School Nongpoh.
Ka shlem treikam jong u DSO ka la pyntip ruh ba ki nongjop ha kane ka lympung, kin sa ïoh pat ïa ka lad ban shah pyntbit shuh shuh ha kine ki khyndiat sngi kiban sa wan na ka bynta ban mihkhmat ïa ka District ha ka State Level Inter School Athletics Meet 2024 kaban sa long ha ka nongbah Shillong.
Haba kren ha kane ka sngi, u Raja Brahma u la ong ba ka jingïalehkai ka dei kawei na ki mat kaba donkam bha ha ka jingim jong ki briew khamtam eh ïa ki khun samla kiba dang khie dang san bad kiba don hapdeng ka jingpule da kaba ong ba ka jingïalehkai ym tang ba ka ïarap ban ïoh ïa ka met kaba koit kaba khiah, hynrei ka ïarap ruh ban pynproh ïa ka jingmut jingpyrkhat bad ban pynlait ïa ki khynnah na ki jingsniew kiba don sawdong ki jong ki.
Utei u heh ophisar ka Ri Bhoi u la ai khublei kyrpang ruh ïa baroh ki khynnah kiba la ïoh ban khur ïa ki takma bapher bapher ha kane ka lympung bad kyntu ruh ba kin dang ïai minot ban pyntbit shuh shuh ïalade bad kito ki bym shym la ïoh khur takma ruh ba kim dei duh mynsiem, hynrei ba kin nang ïai trei shitom haduh ba kin poi sha ka thong.
