Moscow, Jymmang:
Katkum ki khubor, la ong ba ka Russia ka la kem noh ia kawei ka nongthoh khubor kaba la ithuh kyrteng kum ka Nadezhda Kevorkova bad ka ïingbishar jong ka Russia ka la pynngat ia kane ka briew hapoh ki kyndon jingpynkheiñ aiñ kaba syriem bad ki kam thombor jong ki lehnoh. Kane ka nongthoh khubor ka la shu shah kem ei tang namar ba ka kren pyrshah ia ka Russia hapoh ka rynsan Social Media lyngba ka Account shimet jongka.
Ka Kevorkova, 65 snem ka rta bad ha katei ka jingkren jongka, ka la kren shaphang ka jinglong-jingman ha Middle East, kynthup ia ka jingiakynad hapdeng ka Israel bad ka Gaza kaba la synshar hi da ki lehnoh Hamas.
La ong ba ka Kevorkova ka la shah kem noh bad ka la shah pynshong ha ka jaka sah shipor hynrei ia ka rai khatduh ban shim halor katei ka jingpynkheiñ aiñ jong ka yn sa shim ha kine ki sngi kiba bud.
La ong ba katei ka nongthoh khubor ka la sdang ban kren shaphang kitei ki jingjia naduh u snem 2018 haduh u snem 2021, kumjuh ruh ia kawei ka jingpyllait pateng jong katei ka nongthoh khubor ia ka jingkren jong kiwei pat ki nongthoh khubor halor ka jingleit thombor ki lehnoh 2005 ia ki jaitbynriew Nalchik bad kawei pat ka jingkren ba ka la pyllait pateng halor ka jingshah thombor ka Afghanistan.
