Shah kurup palat 536 tylli ki tiar siat ba don Licence bad shah pynduh 4,705 tylli ki Licence

Lucknow, Jymmang:

Kumba la buh jingkheiñ la ong ba naduh ka 16 tarik, Lber haduh ka 9 tarik, Jymmang, 2024, ka tnat pulit jong ka UP ka la ïoh ban kurup ïa 536 tylli ki tiar siat kiba don Licence na ki runar bad ki riewpynkheiñ aiñ namar ka jing-ai hukum jong ka Election Commission.

Shuh shuh la ong ba ki la don kumba 4,705 tylli ki tiar siat kiba don Licence kiba la shah pynduh noh, la ïathuh ka tyllong khubor. Kumba la ïoh jingtip, la ong ba ki heh pulit ki la phah jingthoh hapoh ka jingtreikam jong ka Code of Criminal Procedure (CrPC) na ka bynta ban pyrkhing tyngeh ha kaba ïadei bad ka leit ka wan ne ka ïaid ka ïeng jong ki 27,20,387 ngut ki briew ha kaba 24,48,726 ngut kiwei pat ki la shah pyrkhing halor kane ka jingpyntreikam.

Ïa kine ki jingtrei shitom ha ryngkat ki jingpyrkhing la wanrah kum shi bynta ban buh jingshngaiñ ha ka por ba don ka ilekshon Lok Sabha Elections.

Shuh shuh ki tnat pulit ki la knieh noh ïa kumba 9,059 tylli ki tiar siat ki bym don License, 9,149 tylli ki kuli, 3019.32 kilogram ki tiar pynbthei bad 522 tylli ki bom.

Ïa ki jingleit khynra la pynlong ha ki 4016 tylli ki Centre kiba la shna bad pynmih beaiñ ïa ki tiar siat da ki pulit bad 173 tylli ki Centre ki la shah khang noh.

U Chief Electoral Officer, jong ka jylla u Navdeep Rinwa, u la ong ba ha ryngkat ka jingpynbna jong ki tarik ban pynlong ïa ka ilekshon na ka bynta ka Lok Sabha General Elections 2024 ïa kane Model Code of Conduct la pyntreikam ha baroh kawei ka jylla khnang ban pyntikna ban pynïoh ïa ka jingthep vote kaba khuid, kaba hok, ba suk ba saiñ, kaba ïaid beit ïaid ryntih bad lait na kiwei pat ki jingshah ktah ne ki jingdkoh treikam.

Ka Election Commission of India (ECI) ka la pynbna ba ha ka 16 tarik, Lber, 2024 ka ri kan sa pynlong ïa ka jingthep vote ha 7 tylli ki bynta na ka bynta ka ilekshon Lok Sabha, kaba la sdang naduh ka 19 tarik, Ïaïong bad kut haduh ka 1 tarik, Jylliew, ïa ka jingñiew vote yn sa pynlong ha ka 4 tarik, Jylliew. 

Naduh ba la pynbna ïa ki tarik ban pynlong ïa ka ilekshon, ïa ka Model Code of Conduct (MCC) ruh la pyntreikam.