London, Jymmang:
Uwei u tymmen, 75 snem, uba la shah pyllait na ka patok na Pakistan, ha ka Sngi Thohdieng pat u la shah rai set patok biang baroh shi jingim namar ka jingpyniap ia ka heh pulit nong Bilat ha ki 20 snem mynshwa.
U Piran Ditta Khan u la phet na Pakistan hadien ka jingshah siat iap jong ka Sharon Beshenivsky katba ma ka bad ki para pulit ki dang ia don hajan ka jaka ba jia ka jingshah tuh ha Bradford jong ka thaiñ Shatei ka England.
La ong ba wat la utei u briew um dei u nong-siat ha katei ka jingjia, hynrei hadien ba la tohkit bniah la shem ba u dei u nongsuh buit ban shim ia ka jingim jong katei ka pulit da kaba rah ruh ia ki tiar siat ban pyndonkam ha katei ka por shuwa ba kan shah siat noh ha uwei pat u runar.
Kumta, u Nongbishar Nicholas Hilliard jong ka Leeds Crown Court ha ka Sngi Thohdieng u la shim ia ka rai ban set patok ia u Piran Khan baroh shi jingim da kaba antad bad buh haduh 40 snem ka por ban set patok ia u.
Ka Beshenivsky, ka la don 38 snem ka rta ha ka por ba ka la shah siat iap noh bad ka nang shu kiew kyrdan dang 9 bnai kum ka heh jong ka West Yorkshire Police. Kaba kham sngewsih shuh shuh ka long ba katei ka heh pulit ka la shah siat ruh ha ka sngi kaba dei ka sngikha kaba saw jong ka khun.
Kumta, katei ka khun ka la iathuh ba man ba ka sngikha jong ka ka wan, ka dap tang da ki jingkynmaw bad jingsngewsih halor kaei kaba la jia ia ka kmie mynba ka dang don 4 snem ka rta.
Hynrei ha katei ka por la ong ba ka dang rit palat ba kam pat shym la sngewthuh ba balei ka kmie jongka, ka slem ban wan phai iing na jingtrei.
U nongbishar Hilliard u la ïaroh ia ka jingshlur jong katei ka heh pulit bad kitei ki pulit kiba synran ia ka ha utei u snem, naba kam tip ia kiba kumno ki briew bad ki runar kiba kan hap ban iakynduh markhmat hynrei tang mar ia ioh ia ka jing ujor, ka la leit her mar-mar sha katei ka jaka khlem da pyrkhat ne artatien ban len ia la ka jong ka jingim.
