Bertina Lyngdoh
Kohnguh la dei ban kohnguh,
Pyndem la dei ban pyndem;
Sngap bad shahshkor haba sngew,
Wat mynthi ne leh bym sngew;
La hajan ne sha jngai.
Mih bran bran haba sngew,
Haba iohi pynkloi la ki kti;
ïengjoit, pynsted kum u Nongïada:
Ban lait na ka apot ka lanot.
Pynshongñia la ki khun ki kti,
Bsa shitom ban im ma ki;
Wat leh bym sngew ïa ka bynniaw jong ki :
Ba poi ka por te phin duh ïaki.
Kine ki jingkren haneng, ki thew ïa ka jingïadei ka kmie, u kpa bad la ki khun. Kum ki khun ka dei ka rukom ban kohnguh la kmie la kpa, ban sngap, ban shim ïa kaei kaba ki ong, ban leh ïa kaei kaba ki bthah, ban leit shaei ba ki phah, ban minot, ban trei shitom bad kumta ter ter. Ka rukom ba ki khun ki hap ban kohnguh la kmie la kpa, kam dei tang ka rukom hynrei ka dei ruh na ka ktien u Blei. Haba ngi dei kita ki barit, kumta ruh ngi hap ban pyndem hakhmat ki baheh. Ka ju long barabor, ba bunsien ki barit, ki kham bakla ban ïa ki baheh. U barit u ju kham tamsneng ruh namar u dang don ka por ba un dang hap ïaid ha ka lynti kaba dei. Kaba shisha ruh ka long, ba haba u barit u wan ban ujor, uba heh um da kham sngap namar u sngew ba ki dei tang ki jingïakynroi khynnahrit.
Lada bynñiaw ne ïam u khynnah rit, kumno yn pyneh ïa u lada ym sngap ïa ka ud ka nam jong u. Ban shu ong ba u ïam tasam, kam lah long naba don ki daw kaba pynïam tasam ïa u. Ban kynnoh ba u runar ne dakaid ruh kam ïahap, ba ïoh ym dei nalade hi hynrei na kiwei pat. Ban ong ba ki tamsneng ruh da kumno te, naba um da don ka bor ktien bor met hynrei da kaba ïam shla kaba mut ba ki baheh kin sngewthuh ïa u.
Namarkata, kum ki kmie ki kpa, donkam ban sngap lem ïa kaei kaba ki khun ki pynsngew hangi. Dei ruh ban long kita kiba stad ban ngeit ïa kaei kaba ki khun ki pynsngew. Wat sngap shiliang shkor bad pyllait pat na shiliang, ïoh ba kan lap te sha ka jingsngewsih ïa ki arliang mamla kumba ka kmie ka kmie ba pynshong ïa ki khun halor u maw katba ka dang trei ïalade. La duk ne suk, khiah ne shitom, long kiba don por ban sngew ban sngap la ki khun. Don ki por ba kaba ong ki khun ruh kaba dei, ym tang ba ong ki kmie ki kpa ne kiwei pat. Kumta, ïa sngap markylliang, ban ïa bha lang baroh arliang.
