Taiwan, Jymmang:
Ki pulit ka Taiwan ki la iathuh ba kawei ka briew ka la buhrieh ia ka met jong u kpa hapoh ka iing sah lajong tang ban ioh kam ia ka pisa baibam jong u kaba ju poi man la u bnai hapoh ka Account jong u. Hynrei ki bor pyniaid kim shym la pynpaw kyrteng ia katei ka briew kaba la im bad la u jong u kpa mynta la 50 snem eiei.
Katkum ki khubor, la ong ba ki bor pyniaid ka Taiwan ki la suba sniew ia katei ka briew ha u Naiwieng mynshem snem naduh ba katei ka briew kam shym pdiang briew shuh ban rung hapoh ka iing sah jongka bad ka la khang wat ia ki briew ka koit-ka khiah ba kin leit rung shapoh ka iing jong ka. Namar kane, katei ka briew ka la shah daiñ kuna haduh kumba NT$60,000 (kumba 1.50 lak ha ka pisa India).
Kumta la ong ba katei ka jingbym ailad jong ka ia ki briew ka koit- ka khiah bad ia ki briew jong ka sorkar, ka la wanrah ia ka jingsngewkhia bad na ka liang ki bor pyniaid ki la phah khynra bad syntiat ia ka iing bad ia ka jinglong-jingman ha ka iing bad jingim jong ka. Hynrei la ong ba haba ki heh pulit ki tohkit ia ka shaphang u kpa jong ka, katei ka briew ka la thok bad ong ba u kpa u don ha ka jaka ri tymmen namar ba kam lah ban peit bad sumar ia u tang da lade shimet.
Hynrei ynda haba ki pulit ki la tohkit bniah bha, la ong ba katei ka briew ka la kren kyllaiñ bad ialeh ban kiar na katei ka mat bad thok pat ba u hynmen jong ka u la ialam bad ri hi noh ia u kpa jong ki sha Kaohsiung. Haba iadei bad kane ruh, ki pulit ki lap ba utei u hynmen jong ka lei u la dep iap naduh 50 snem mynshwa bad kam shym la don ruh kano-kano ka jingthoh ne sabut ba utei u kpa jong ka u la mih noh na Taiwan. Nalor kane, katei ka briew ka la thok biang bad ong ba u kpa jong ka u la dep iap la kumba katto katne snem hynrei kam shym don pat ia ka syrnod lane ka ‘Death Certificate’ ban pynshisha ba u kpa jong ka u la iap.
Kumta, la ong ba kine kiei-kiei ki la pynlong ia ki bor pyniaid bad ki pulit ba kin leit khynra bad talasi ia ka iing ka sem jong ka, ha kaba la shem ia kawei ka plastik thep ñiut kaba iong kaba la song ia ki shyieng briew bad la sngewthuh ba ki dei ki shyieng jong utei u tymmen uba la dep iap la slem hynrei namar katei ka briew ka la shu thep bad song ha katei ka plastik khnang ba kan ym duh ia ka pisa baibam kaba ju poi sha ka Account jong u kpa bad ba kan ioh ban pyndonkam kylluid kumba ju long barabor. Ki stad saïan bad ki doktor ki la iathuh ba kan shim por haduh kumba 2 snem eiei ia ka met jong u briew ba la iap ba kan kylla shyieng ne ba kin sah sa tang ki shyieng.
Ki bor pyniaid ki la iathuh ba utei u kpa jong katei ka briew u dei uba la shongthait na ka kam shipai bad uba la trei kumba 20 snem ha ka kam. Namarkata, u la ioh ia katei ka pisa shongthait kaba katkum ka kyrdan jong u. Haba iadei bad kane, la ong ba ki heh jong ka tnat shipai ka Taiwan ki ju ioh ia ka pisa baibam kumno-kumno kumba NT$49,379 bad ha ka pisa India ka la poi kumba 1.27 Lak.
Kumta, la ong ba mynta ba ki bor pyniaid ki la lap ia katei ka jingshisha, kin dang peitthuh pat la katei ka jing-leh jong katei ka briew ka long kaba kumno bad ha kino ki kyndon pynkheiñ aiñ kiba dei ban pynngat ia katei ka briew.
