Shillong, Jymmang 13
U Aman Sehrawat u la long uba nyngkong eh napdeng ki nongïalympat jong ka India ban ïoh jaka sha ka Paris Olympics ha ka kyrdan ïalehkai 57kg hadien ba u la ïoh jingjop ha ka World Olympic qualifier kaba la long ha Istanbul.
Une u rangïalehkai uba la khur takma ha ka Asian Games u la lah ban pynpaw ïa ka jingtbit da kaba u la lah ban ïoh jingjop na ka bynta ban ïoh jaka hadien ba u la lah ban pynliem ïa u nongïalehkai uba la khur ïa ka takma rupa ha ka Asian Games u Chongsong Han uba na North Korea da 12-2 ha ka jingïakhn semi-final.
Te kumta u rangïalehkai uba la khur ïa ka takma rupa ha ka Tokyo Olympics u Ravi Dahiya uba la ïashim bynta ha kajuh ka kyrdan u donkam ban ïalehkai bha na ka bynta ban ïoh jaka sha katei ka lympung ka ban long ha Paris.
Ha kawei pat ka liang u Sujeet Kalkal u la lah ban pyni ïa ka jingtbit na ka bynta ban jam sha ka semi-final, hynrei u la shah rem ha u rangïalehkai na Mongolia u Tomor-Ochiryn Tulga da 1-6. Hynrei utei u rangïalehkai ba dang 22 snem ka rta uba la khur ïa ka takma rnong ha ka Tokyo Olympics u la mih bujli ha ka kyrdan jong u Bajrang Punia kaba 65kg hadien ba u Punia u la shah sospon na ka daw ba ula kyntait ban shah test ïalade, u dangdon jingkyrmen ban ïoh rung sha katei ka lympung.
Lah ban pynkynmaw ba ha u bnai ba lal ah, u Sujeet um shym la ïoh ban ïashim bynta ha ka Asian qualifiers kaba la long ha Bishkek, Kyrgystan hadien ba u la poi slem na ka daw ka jingshlei um ha kad liengsuiñ kaba ha ryngkat bad u Deepak Punia.
Hashwa ba un jam sha ka quarter final u Aman uba la khur ïa ka takma ksiar ha ka Asian Championships u la lah ban pynliem ïa u Georgi Vangelov (10-4) bad ïa u rangïalehkai na Ukraine u Andrii Yatsenko (12-2).
Kumba ka paw kane ka long ka jingpyrshang kaba lai ia u Aman ban ïoh rung sha ka Paris Olympics. U la bat ïa ka kyrdan ba nyngkong hapoh ri India ha kaba u Ravi Dahiya u la khur ha ka Olympic kaba ha Tokyo. Hynrei u Dahiya u la ïakynduh jingeh ha u snem ba la lah na ka daw ba u la mynsaw ka khohsiew bad u la donkam ban phah sumar. Te kum u Aman u la lah ban pynliem ïa u Dahiya ha ka jingpyrshang (selection trials) kaba la long ha la ïing na ka bynta ban jam sha ki lympung ïaknieh rung sha Paris.
Ha ki ar snem ba la lah, u Aman u la lah ban pynaw ïa ka jingtbit. Ha u 2022, u la la long u lahduh ha ka World U-23 Championship. Ha u snem ba la lah, u la khur ïa ka takma rnong ha Hangzhou Asian Games bad ïa ka takma ksiar ha ka Asian Championships kaba ha la long ha Astana.
Ha kawei pat ka liang ka long ka jingduh nong kaba khraw ïa u rangïalehkai Tokyo Olympic u Deepak Punia, uba la shah rem noh tang ha ka wat kaba nyngkong ha u Zushen Lin uba na China da 4-6.
