Guwahati, Jymmang:
Ka kynhun jong kiba bun ngut ki nongshong shnong, ki la pynlong da ka jingïakhih ha Kahibari kaba don ha Baksa ban dawa ha ka ban phah shna ïa ka jingkieng. Ki nongshong shnong jong ka Kahibri ki la pynpaw ba ki la ïakynduh ïa shibun ki jingeh naba kam don ka jingkieng ban pynïasoh bad ki shnong ba marjan.
Ha kane ka aïom Lyiur, ki khynnah skul ki la ïakynduh jingeh shibun namar ka jingbym don jong ka jingkieng ha kaba ki la duh ban leit sha skul. Ki briew kiba shitom ki la shu duh ei ïala kajong ka jingim namar ym lah ban pynpoi ïa ki sha ka jaka ai jingsumar ha ka por kaba biang. Kumba la sakhi, la ong ba ki briew kim lah ban ïaid ne jam na shiliang sha shiliang ha ka por ba shlei um namar bym don jingkieng ka ban pynïaoh bad kawei pat ka jaka.
“La shu pynsngew bad kular ha ngi ha kaba ngi la don jingkyrmen halor kane haba ka seng UPPL ka la don ha ka bor synshar. Kine ki la ju pyrta bad pynbna ba ka sorkar UPPL ka ïeng ha ka bynta ban wanrah ïa ka roi ka par. Ka seng ka la trei na ka bynta ban kyntiew ha ka liang ka roi ka par ha kiwei pat ki jaka hynrei ka la ieh bad leh shiliang ïa ngi. Kam ju phai khmat ban wanrah ïa ki kam pynroi ha kane ka jaka jong ngi,” la ong ki nongshong shnong kiba la pynlong ïa ka jingïakhih.
“Ngi la leit sha u DC, hynrei kim ju wanrah ïa ka mat ba ïadei bad ka jingbym don ka jingkieng ha ka shnong jong ngi. U SDO u la ju jurip ïa kane ka jaka da bun bun sien bad nga la ai bad pyni ruh ïa ki dur, haduh mynta ym pat leh ei ei,” la ong uwei na ki nongshong shnong.
Ha kaba ïadei bad kane, ki nongshong shnong jong ka Kahibari ki la buh ka jingkyrpad ïa ka sorkar ba kan shimkhia ha kaba ïadei bad ki jinglong jingman kaba la buh jingeh ïa ki nongshong shnong.
Kumba la sakhi, la ong ba ki khynnah mynta kim da ïoh leit skul namar ba ka dei ka aïom slap ha kaba kim ïohlad ban ïaid lyngba ka shnong na ka bynta ban leit sha skul ha ka por shlei um.
