Morelos, Jymmang:
Katkum ki khubor, la iathuh ba 8 ngut ki la duh ia ka jingim ha ka jingjia synreit kuli hapoh ka thaiñ Morelos jong ka ri Mexico kaba la jia ha ka Sngi Saitjaiñ mynshem taiew.
Kane ka la jia ha ka thaiñ municipal jong ka Huitzilac ha ka Sngi Saitjaiñ hajan ka shnong ba smat ban leit rung ki ‘riew shangkai pyrthei.
La ong ba 4 ngut ki dei kiba la khlad noh syndon hashen ha katei hi ka jaka bad kiwei pat ki dei kiba khlad hadien ba la pynkit sha ka jaka-sumar.
Ka Morelos ka dei ka jaka jngoh kai kaba paw na ka bynta ki ‘riew shangkai pyrthei bad kumjuh ruh ia ki paidbah nongshong shnong ka ri Mexico wat la ka long ka bynta khappud ba don mar khap bad ka Guerrero, ha kaba ki kam khaïi drok be-aiñ ki jyllei bha.
Ha u Naiwieng mynshem snem, ka la don ka jingiakhun kaba jur hapdeng ki pulit bad ki runar nongkhaïi drok ha kaba 9 ngut ki la khlad na katei ka jingjia hapoh Cuer -navaca.Palat 4,50,000 ngut ruh ki briew ki la khlad na kum kitei ki jingjia hapoh ka ri Mexico naduh u snem 2006 haduh kane ka kynti kaba mynta.
