Porto Alegre, Jymmang:
Ki bor pyniaid ka Brazil ha ka Sngi U Blei ki la iathuh ba ka um ha ki wah jong ka thaiñ Shathie jong ka Brazil ki la shlei bad kiew biang, ha kaba ka jingjah rngai jong ki briew na ka jingshlei um ha katei ka bynta jong ka ri ka la nang kiew sha ka 145 ngut bad da ki hajar ngut ki paid nongshong shnong ki la hap ban phet bad ban ieh noh ia ki iing- ki sem namar ka jingsheptieng ia ki jingma jong ka jingshlei um hadien ba ki wah kiba don ha katei ka thaiñ baroh ki la kiew um bad shlei.
La ong ba ki nongshong shnong ka Rio Grande do Sul ki la ioh mad ia u slap uba thymmai hadien artaiew ba ki la sakhi ia u ‘lapbah bad ka jingshlei ki wah kiba don hajan ki shnong jong ki bad kaba la wanrah ruh ia ka jingshlei um bad ka jingshah tap um jong bun tylli ki shnong kiba dei sha katei ka thaiñ Shathie jong ka ri.
La ong ba ki la don kumba 2 Million ngut ki paidbah nongshong shnong katei ka thaiñ kiba la shah ktah na kitei ki jingjia shlei um ha kane ka sien.
Kumba la iohi lei ia ka jinglong-jingman ha katei ka thaiñ, baroh ki wah kiba don ha kylleng ki bynta jong ka Shathie Brazil ki la sdang ban shlei bad katei ka um ka ban shlei na kitei ki wah kan sa tap sa ia bun tylli ki shnong kiba don sha katei ka bynta jong ka ri Brazil.
Tad haduh ka step Sngi Nyngkong ba la pyllait ia kane ka khubor, ki don 132 ngut kiba la ioh jingtip ba ki la jah na kitei ki jingjia shlei um bad palat 6,19,000 ngut ruh kiba la hap ban phet bad ieh noh ia ki iing ki sem jong ki kum ki phetwir namar ka jingma kaba ap ia ka jingim jong ki lada kitei ki wah kiba don ha kylleng jong ka bynta Shathie kin shlei bad kan tap ia ki shnong- ki thaw bad ia ki iing ki sem jong ki.
Kumta, la ong ba kane ka khubor ka long ruh katba ki tnat iarap ki dang ialeh ban leit iarap bad ban wad ia kitei ki 130 tam kiba la dep jah rngai lypa na kitei ki jingjia shlei um ha kine ki taiew ba la leit.
