New Delhi, Jymmang:
U Myntri Rangbah jong ka Delhi u Arvind Kejriwal, uba la shah pyllait jamin shipor hadien ba u la shah set kumba 50 sngi ha patok ha kaba ïadei bad ka jingshah kynnoh donkti ha ka jingpyndkoh treikam ha kaba ïadei bad ka jingdie ïa ka kyiad ha Delhi, ha ka Sngi U Blei, u la kular ba un sa pyllait ei ka bai bording bad ban nang pynbha shuh shuh halor ki lad ba ïadei bad ki jingai jingsumar lada ba u shahjied bad wan ha ka bor.
U Kejriwal u la pyllait paidbah ïa kumba 10 tylli ki jingkular jong ka seng AAP lada ka seng ka wan ha ka bor synshar ha kane ka jingïakhun ïa ka ilekshon Lok Sabha 2024 ha ryngkat ka jingai ïa kiba bun ki jingmyntoi sha ki paidbah kynthup ban pyllait ei ka bai bording.
“Ka BJP borabor kam ju lah ban pynurlong ïa ki jingkular kiba ka la khlei. Ki paidbah ki la dei ban rai la ki kwah ban ïoh jingmyntoi na ki jingkular jong u ‘Kejriwal lane ki jingkular jong u Modi,” la ong u heh nongïalam jong ka seng AAP ha ka por ba la don ka jingïalap ilekshon kaba dei ha ka sngi kaba ar hadien ka jingshah pyllait jamin jong u.
“Na ki 10 tylli ki jingkular, ka jingkular kaba nyngkong ka dei ban pynbiang ka bording ha baroh 24 kynta ha ka ri. Ka ri ka lah ban pynmih da kumba 3 lak MW ka bording hynrei ka jingpyndonkam ka la long tang 2 lak MW. Ka ri jong ngi ka lah ban pynmih bor ding palat ïa ka jingdawa.”
“Ngi la leh ïa kane ha Delhi bad ha Punjab, ngin sa leh ïa ka ha baroh kawei ka ri ruh. Ngi la lah ban pynbiang ei da kumba 200 unit ka bording sha ki briew ki baduk. Ka jingpynlut halor kane kan poi sha ka `. 1.25 lak klur, ngi la pynbeit ryntih bha ha kaba ïadei bad kane,” la ong u Kejriwal.
Ha ka sngi Saitjaiñ u la pynlong ïa ka jingïalang kaba nyngkong ba ki nongthoh khubor ha kaba u la pynshisha da kaba ong ba ka seng BJP mynta kan sa ïoh jingjop ha palat 220 tylli ki konstitwensi bad kan ym lah pat ban thaw sorkar.
Ka Supreme Court ka la pyllait jamin shipor ïa u Kejriwal khnang ban ailad ba un pynlong ïa ka jingïalap ilekshon na ka bynta ka ilekshon Lok Sabha. Ha kaba ïadei bad kane, u la hap leit aiti ha ki kti jong ka aiñ ha ka 2 tarik, Jylliew, hadien ka sngi kaba khatduh bad kaba kut jong ka jingpynlong ïa ka ilekshon jong ka bynta kaba 7.
