Shillong, Jymmang 13
U coach ka England u Gareth Southgate u la kyntait ban pynpaw eiei halor ka jingkam ban leit ïasoh sha ka Manchester United na ka bynta ban mih bujli ha ka jaka u Erik ten Hag u ban shah weng noh haba kut ka aïom ïalehkai.
U Southgate u la ong ba ka jingthmu ka jong u ka long na ka bynta ka lympung ïalehkai Euro ka ban wan bad ka jingangnud ka jong u ka long na ka bynta ban bteng biang ïa ka kontrak kaba thymmai bad ka England.
Ki ar tylli ki aïom kiba u Ten Hag u la shimti ban pynïaid ïa ka United ki la poi sha kaba kut bad kane ka kynhun kam shym la don jingkyrmen ba kan ïoh ïalehkai ha kino kino ki lympung ïalehkai baheh ha Europe na ka bynta ka aïom ka ban wan.
Halor kane ka nongrim, ki khubor ki ïathuh ba ka United ka la khmih lynti ban wanrah noh da u manager uba thymmai bad u Southgate u la don ha ka thup kaba hakhlieh ban mih bujli noh ha ka jaka utei u manager uba na Netherlands.
