Shillong, Jymmang 13
U Novak Djokovic u la pynpaw ka jingsngewkyndit ba un shah rem noh tang ha ka wat kaba lai jong ka Rome Open ha u Alejandro Tabilo ha ka Sngi U Blei. Kane ka la jia hadien ar sngi ba u la shah kawang da u klong um na khlieh bad u la ong ba dei kane kaba la pynlong ïa u ban kiengkhlieh.
Wat la une u khlur ïalehkai na Serbia u la khmih lynti ban rah ïa ka jingjop kaba 41 ha ka Masters 1000, hynrei u la mad ïa ka jingshah rem ha u rangïalehkai na Chile uba don ha ka kyrdan ba 32 ha ka pyrthei bad ban pynlong ïa u ban ïoh ia ka jingjop kaba nyngkong ïa ki khlur ïalehkai kiba don hapoh ka thup kaba shiphew da 6-2, 6-3.
Utei u rangïalehkai uba la bat ïa ka nam jop kaba 24 sien ha ka Grand Slam u la ong ba ka jinghiar ha ka rukom ïalehkai kaba u la jop sien ki nam lahduh, u la ong ba ka lah ban ktah na katei ka jingshah kawang da u klong um ha ki paidbah nongkyrshan mynta ha miet sngi Thohdieng.
Ha ka jingshisha ha katei ka jingjia u la pynpaw ïa ka jingphuh samrkhie shwa ba un shah kawang da u klong um hadien ba u la khur ïa ka jingjop ha ka wat kaba ar pyrshah ïa u Corentin Moutet.
“Ngam lah ban ong eiei halor kane ka jingshah rem, hynrei ngan hap ban phah khmih bniah. Ka jingkilanmet ka la pher ha nga. Wat la ngam shym la don kano kano ka jingsngew, hynrei ka rukom ïalehkai ka jong nga kam long shuh kumjuh la ong u Djokovic.
“Mynta ka sngi hapdeng ka jingkulmar jingmut ngam shym la lah ban ïalehkai bha bad ym dei na ka daw ka jingpang, hynrei ha ka rukom ïalehkai. Nga la long kum utei pat u rangïalehkai bad ym shym ha ki ar tylli ki jingïalehkai kiba kham hashwa.
Namar kata, u Djokovic u la ong ba un hap ban phah bishar bniah ha shwa ban sdang ka French Open ka ban long ha Paris namar ka jingkhuslai ka jong u ka long halor ka jingshah kawang da u klong um.
