Shillong, Jymmang 13
Ka Arsenal ka la nangjan ban kynjoh sha ka thong ha ka Premier League hadien ba la lah ban pynliem noh ïa ka Manchester United da 1-0 kol ha Old Trafford hadien ba la lah ban jam sha ka kyrdan ba hakhlieh duh ha ka miej khein point.
Kane ka nam jop ka la wan urlong lyngba u Leandro Trossard uba la ïoh ban thep ha ka minit kaba 20 bad ban pynlong ïa ka Arsenal ban khur ïa ka jingjop kaba 2 ha ki 17 sien ki jingïakhun shabar na la ïing bad ka la tam da shi point ïa ka City.
Kumjuh ka Manches -ter City ka dang don hapdeng ka jingïaknieh ha kaba kane ka lahduh jong ka aïom ba la dep ka dangsah sa ar sien ïakhun, katba ka Arsenal ka dangsah sa kawei ka jingïakhun.
Te kumta katei ka jingjop jong ka Arsenal ka la buh jingeh ïa ka kynhun u Pep Guardiola hashwa ba kan leit ban ïakhun pyrshah ïa ka Tottenham ha ka step jong ka Sngi Balang.
“Ka jingïaid lynti ka jong ngi kan shym la dei jingkyrmen, hynrei lyngba kane ka jingjop kan ïarap ïa ngi ban don hapdeng ka jingïaknieh na ka bynta ban kynjoh sha ka thong,” la pynpaw u manager ka Arsenal u Mikel Arteta.
“Ngi kwah ban tied ïa ka jingkhang bad ban plie ïa ka synduh kaba long ka jingangnud ban pynurlong hakhmat ki paidbah nongkyrshan na ka bynta ban khur ia ka jingjop ha ka Premier League.”
Ka Arsenal kan ïalehkai khatduh ha la ïing pyrshah ïa ka Everton ha ka Sngi U Blei, katba ka City kan ïakynduh pyrshah ïa ka West Ham.
Kane ka jingshah rem ka la pynduh jingkyrmen ïa ka United ban ïoh rung sha ka lympung ïalehkai ka dewbah Europe ha ka aïom ka ban wan.
Kane ka kynhun u Erik ten Hag ka la pyrshang ban ïakhun tyngeh, hynrei ka la shah rem da 4-0 kol ha ka Crystal Palace ha ka Lah Sngi U Blei, hynrei haduh mynta ka dangjop shisien na ki phra sien ïakhun jong ka Premier League.
Kumba ka long mynta ka United (54 point) ka la don ha ka kyrdan ba phra, ka dangduna sa lai point ïa ka Newcastle (57 point), ka ban ïakhun pyrshah ha ka sngi Balang bad ka Chelsea (57 point).
