Shillong, Jymmang 14
Ka jinglah ban thep kol da u Lamine Yamal bad u Raphinha ka la pynlong ïa ka Barcelona ban khur ïa ka jingjop da 2-0 kol ïa ka Real Sociedad bad ban pynlong ïa kane ka kyhun ban wan ha ka kyrdan ba-ar kata ha shwa ïa ka Girona.
Kane ka jingshah rem ka la long ka jingpynduh mynsiem ïa kane ka kynhun kaba la thmu ban ïoh ïashim bynta ha ka Europa League ha ka aïom ka ban wan, ha kaba ka la wan ha ka kyrdan ba hynñiew kata hadien ïa ka Real Betis, kaba la khur ïa ka jingjop ha ka Sngi U Blei.
Ka Barcelona kaba long ka lahduh ha ka aïom ba la lah, ka la pyrshang ban ïalehkai bha hadien ba ka la shah rem ha ka taïew ba la lah ha ka Girona.
Ka Real Madrid ka la ïoh ban rah ïa ka nam lahduh hadien ba ka Barcelona ka la shah rem da 4-2 kol ha ka Girona.
Ha kane ka jingïakhun ka Barca ka la ïoh ban pynkhih jar nyngkong eh lyngba u Yamal ha ka minit kaba 40 na ka bynta ban tam da shi kol ha ka kylla step. Ha shwa ban wai kane ka kynhun ka la thep biang ïa ka kol kaba ar lyngba ka penalty ba la shut da u Raphinha ha ka minit kaba 90+3 na ka bynta ban khur syndon ïa ka jingjop.
“Ka La Real ka long ka kynhun kaba khlaiñ bor, hynrei ka long kaba kongsan ba ngin khur ïa ka jingjop,” la ong u coach ka Barca u Xavi hadien ba la kut ka jingïalehkai.
Ha kane ka jingïakhun u Xavi u la pynshong ïa u rangïalehkai ‘dien na Uruguay u Ronald Araujo na ka daw ba um shym la lah ban ïalehkai bha ha kane ka aïom bad ruh uba la shah sei da ka red card ha ka jingïakhun pyrshah ia ka Paris Saint-Germain ha ka Cham-pions League ha kaba ka la mad ïa ka jingshah rem.
Wat la kane ka kynhun kam shym la lah ban khur ïa ka nam lahduh, hynrei ki bor pynïaid ki la ailad bha ha u Xavi na ka bynta ka aïom ka ban wan.
