Shillong, Jymmang 14
Ka shlem treikam u District Sports Officer (DSO) East Khasi Hill ka la pynbna ba kan pynlong ïa ka lympung ïalehkai phutbol ba la tip kum ka District Level Inter School Subroto Cup Football Tournament 2024 naduh 10 tarik u Jylliew ha kane ka nongbah.
Kane ka lympung ïalehkai ka dei tang na ka bynta ki skul kiba hap hapoh kane ka district bad yn phiah ha ki lai tylli ki kyrdan ïalehkai kata ka Under-15 jong ki shynrang, katba ka under-17 ha ka liang ki kynthei bad shynrang.
Ïa ki form lah ban ïoh na katei ka shlem treikam kaba don ha JN Stadium, Polo ha ka por long trei lane ki lah ban phone ha ki number 8131860839 (Under-15), 8974606849 (Under-17 Boys) & 9774096821 (Under-17 Girls).
Na ka bynta ka Sub-Junior (Under-15) ki khynnah ki dei ban long kiba la kha shwa lane hadien ka 1 tarik u Kyllalyngkot 2010, katba ha ka Junior Under-17 ki khynnah ki dei ban long kiba la kha shwa lane hadien ka 1 tarik Kyllalyngkot 2008. Ka tarik ba khatduh ban pynpoi ïa ki entry kan long ha ka 28 tarik mynta u bnai bad ka jingkhmih bniah ïa ki rta ki khynnah kan long ha ka 31 tarik mynta u bnai. Ki khynnah ki dei ban wanrah lang ïa ki kot ki sla ki ban pynshisha ïa ka snem kha kum ka syrnod sngi kha bad ka Adhaar Card.
