Shillong, Jymmang 14
Hadien u Aman Sehrawat, ka Nisha Dahiya ka la long sa kawei pat ka nongïalympat kaba la lah ban pynthikna ïalade ban ïoh rung sha ka Paris Olympics ka ban long ha u Naitung mynta u snem.
Kane ka jinglah pynthikna kine ar ngut ka la wan hadien ba ki la lah ban ïalehkai bha ha ka World Olympic Wrestling Qualifiers kaba la long ha Istanbul, Turkiye, katba u Sujeet Kalkal bad u Jaideep Ahlawat kim shym la lah ban khur ïa ka takma rnong ha ka Sngi U Blei.
Ka Nisha kaba dang 24 snem ka rta kaba la khur takma rnong ha ka World U-23, ka la lah ban pynthikna hadien ba ka la lah ban pynliem noh ïa ka Alexandra Anghel kaba na Romania da 8-4 ha ka jingïakhun semi-final.
Kumba ka long mynta kane ka long ka sien kaba san ïa ka India ha ka liang ki kynthei ban ïoh rung sha ka Paris kata kadien ka Vinesh Phogat (50kg), Antim Panghal (53kg), Anshu Malik (57kg) bd ka Reetika Hooda (76kg).
U Sujeet Kalkal uba la ïashim bynta ha ka 65kg, u la rung sha ka semi-final ha ka sngi Saitjaiñ, hynrei u la shah rem noh ha u lahduh jong ka Asian Games u Tomor-Ochiryn Tulga uba na Mongolia. Ha ka sngi U Blei, u la shah rem ha u rangïalehkai na USA u Zain Retherford hadien ba ki la ïakhaid mar 2-2.
U Bajrang Punia, uba la khur ïa ka takma rnong ha ka 65kg jong ka Tokyo Olympics, um shym la lah ban pynurlong na ka bynta ki kynhun ki nongïalympat ka ri ha katei ka lympung ïaknieh.
U Jaideep Ahlawat, uba la ïashim bynta ha ka 74kg ula duh noh ïa ka takma rnong hadien ba u la shah rem noh ha ka quarter-final da 2-1 ha u Soner Demirtas uba na Turkiye ha ka sngi U Blei. Kham hashwa u la jop ïa u rangïalehkai na Turkmenistan u Arslan Amanmyradov da 11-0.
Ha kane ka lympung ïalehkai kaba la sdang naduh 9 haduh 12 tarik mynta u bnai ha Istanbul, ki la don 14 ngut ki nongïalehkai ka ri India kiba la ïashim bynta na ka bynta ban ïaknieh noh rung sha ka Olympic.
Kum ban shu pynkynmaw, u Aman Sehrawat uba long u lahduh ha ka Asian Championshim bad ruh ha ka Under-23 World Championship, u la ïoh jaka na ka bynta ka Paris 2024 na ka bynta ka India ha ka 57kg jong ki shynrang ha ka sngi Saitjaiñ hadien ba u la lah ban pynliem ïa u nongïalehkai uba la khur ïa ka takma rupa ha ka Asian Games u Chongsong Han uba na North Korea da 12-2 ha ka jingïakhun semi-final. Te kumta u Aman u la long uba nyngkong eh na ki shynrang ban ïoh rung sha katei ka lympung ha ka men’s freestyle wrestling.
