Shillong, Jymmang 14
Ka lympung ïalehkai Under-15 Inter School Cricket Tournament ba la pynïaid da ka Shillong Cricket Association ka la nangjam shaphrang ha kaba ka Holy Cross School ka la ïoh jingjop hadien ba ka la lah ban pynliem noh ïa ka Ruprekha School da 53 run ha ka Sngi Ba-ar ha madan Polo.
Ha kane ka jingïakhun, ka Holy Cross ka la kam trai ban tied nyngkong ha kaba ka la kamai 80 run bad shah pynhap 1 wiket ha ki 10 over. U Prayas Kunwar u la tied 34 run na ki 26 bol bad u Sumit Sunar u la ïoh 26 run na ki 17 bol. Katba u Tanmay u la shim shi wiket ha ki 2 over na ka bynta ka Ruprekha.
Haba wan beh ïa ka thong, ka Ruprekha ka la kamai tang 35 run bad shah pynhap 7 wiket ha ki 10 over. U Dhunchik u la tied 7 run na ki 12 bol. Katba u Neeraj Rai bad u Ritesh ki la shim mar 2 wiket na ka bynta ki 2 over na ka bynta ka Holy Cross. Ïa ka nam Player of the Match la khur da u Neeraj Rai.
Haba phai sha ka Women’s League bad ka Inter School Under-18 la hap ban pynsangeh noh na ka daw ka jingshah pynthud ha u slap. Te kumta ki kynhun kiba dei ïakhun hynne ka sngi ki la ïasam mar shi point.
