Ka ju long ka rukom ba lada leh eiei u barit, watla ka long kaba tang khyndiat, ki pulit ki shimkhia haduh bym ithuh-ithaw shuh. Ngim ong ïa ki kam pynïap briew ne batbor ne rahbor lane kiwei pat ki jingleh bymman. Hynrei ka jingtynjuh ïa ki pulit ka dei ynda la shah ujor ki heh ki haiñ. Ha kine ki khyndiat sngi ba la lah, ngi ïohi ba uwei u heh MPS (Meghalaya Police Service), u Bah GK Ïangrai, u la leit ujor sha thanat Sadar pyrshah ïa u khlieh duh ka tnat pulit lane Director-General of Police (DGP), u LR Bishnoi, halor ka jingkynnoh ba u la pyndonkam da ka nombor (Number Plate) thok ha ka kali ba ai pyndonkam ïa u. Na ka liang u Bah Prestone Tyngsong, uba long u Symbud Myntri Rangbah, u la ong ba ki pulit ki la pdiang ïa katei ka ejahar bad ka jingtohkit ka la sdang. Ngi dei ban pynkynmaw ba u Bishnoi un sa shongthait noh na ka kam pulit ha ka 19 tarik Jymmang, 2024, bad ha ka jaka jong u, ka sorkar ka la pynbna ba ka la thung da ka Kong Idashisha Nongrang.
Ngim tip haduh katno ka jingkren jong u Bah Prestone ka long kaba shisha namar bunsien, ki pulit ki kham leh kiar ban shim ïa ki sienjam kiba dei ban shim pyrshah ïa ki heh ki haiñ. Ka long shisha kaba be-aiñ ban pyndonkam da ka nombor thok ha ki kali, bad ka aiñ kam don jingmap halor kane. Kumno yn shim da ka nombor na kawei ka kali ban pyndait ne pyndonkam ha kawei pat ka kali? Man ka kali ka don la u jong u nombor kumba la mang da ka shlem treikam u District Transport Officer (DTO) namar dei lyngba u nombor kali ba ngi sa lah ban tip ïa ki trai lane ka jingsiew ne jingbym siew ïa ki khajna bad kumta ter-ter. Lada ïa bujli ïa ki nombor, ka long kaba be-aiñ haduh katta-katta namar lah ban leh ïa kiba bun jait ki kam bymman bad buhrieh ynda la pyndep ïa kita ki kam. Kam dei satia ka kam kaba sting ban bujli nombor namar ka lah ban ïalam sha kiwei pat ki jingleh kiba kham buh jingma ïa kiwei.
Lada shu peit na ka jingujor jong u Bah Ïangrai, kam dei kaba jwat ïa ki pulit ba kin tohkit ban lap ïa ka jingshisha. Ki kot ki sla ki don ha ka tnat pulit bad kumjuh ha ka shlem treikam u DTO bad kiwei pat. Lada ki pulit ki mon bad ki ïoh ïa ka lad ban tohkit laitluid, kan ym don jingeh ban lap ïa ka jingshisha kumba ka long. Hynrei kaba eh pat ka long ka jingdon ki diengpynkiang kiba pynwit ïa ka jingtohkit. Lehse ki don ki pulit kiba leh shisha ïa ka kam kumba dei ban pyndep katkum ka aiñ, hynrei namar ki diengpynkiang kiba wit na kadiang bad na kamon, ki shem jingeh. Hynrei kaei kaba dei ban jia ha kane ka kam ka long ba ka jingshisha bad ka hok ka dei ban paw khlem jingtieng jingriej. Lada ïa kiba tlot bor lah ban tohkit naduh tyllong haduh ban da lap ïa ka jingshisha, kam dei ban pher na kiwei pat kiba don ha ka bor. Bunsien la ju ong ba baroh ki long kumjuh hakhmat ka aiñ. To ai ba kine ki kyntien kin long shisha.
Ha kaba ïadei bad katei ka jingujor, u Bah Ïangrai u la dep thoh ruh sha u Superintendent of Police (SP) ka East Khasi Hills, u Rituraj Ravi, ban kyntu ïa u ban shim ïa ki sienjam ban pynneh pynsah ïa ki dur ki dar ba la ring na ki kor CCTV ha thanat Sadar, thanat CID bad Police Headquarters (PHQ). Ha ka shithi, u Bah Ïangrai u la ong ba ha ka 9 tarik Jymmang, 2024, u la leit ban ai da ka ejahar ha thanat Sadar. U la ong ba na ka bynta ka jingbishar ba hok bad ka jingkohnguh ïa ka aiñ, u la kyrpad ba ïa ki dur ba la ring da ki kor CCTV ha katei ka jaka (thanat Sadar) naduh ki ar snem ba la leit noh, dei ban shimti bad ban pynneh pynsah ïa ki khnang ba ka jingtohkit kan long kaba ïaid beit bad nalorkata, ka lah ban don ka jingpyrshang ban pyndam ïa ki dur (ba la ring da ki CCTV) namar ka jingujor ka dei pyrshah ïa u khlieh duh ka tnat pulit. Ha kajuh ka por u la ong ba ka thanat CID, katkum ka jingtip jong u, ka la pyndait ïa ki kor CCTV kaba long katkum ka jingbthah ka Supreme Court na ka por sha ka por. Utei u heh MPS u la ong ruh ba ki don ki kor CCTV ba la pyndait na ki bynta ba shadien bad shakhmat jong ka Police Headquarters (PHQ). U la ong ba kitei ki CCTV ba don ha PHQ kin ïoh beit ban ring ïa ka kali ba la pyndonkam da u Bishnoi ha ka por ba ka rung bad mih na PHQ.
Kane ka bynta ruh ka long ka bakongsan namar kan ïarap ïa ki pulit ha ka jingtohkit ka jong ki halor kata ka kali ba la pyndonkam da u Bishnoi. Lada kita ki dur ki dar ba la ring da ka CCTV ki jah rngai noh, ka jingsuba sniew kaba jur kan mih. Hynrei lada ym don eiei ban buhrieh, ngi ngeit skhem ba kita ki dur ki dar ruh kin ym jah ha lyer. Ngin hap ban ïa peit haduh katno ka jingtohkit jong ki pulit kan poi ha kaba ïadei bad katei ka jingujor jong u Bah Ïangrai pyrshah ïa u DGP. Ngi kyrmen ba ka jingtohkit kan long shisha ka bym shah liang ïano-ïano bad ba tang ki jingshisha kin paw kumba ki dei ban long khnang ba ka jingshaniah jong ki paidbah ha ka aiñ kan nang khlaiñ. Ngi ai mynsiem ïa ki pulit kiba trei hok ïa ka kam ba la bynshet ha ki da ka aiñ, bad ngi kyntu ïa kito ki bym trei hok ba kin da kylla thiah kylla dem khnang ba kin lait na ka jingshah kynnoh bad kynthoh hadien habud. Ailad beit ïa ka jingshisha ba kan paw khlem jingtieng khlem jingriej, bad ba ka bor jong ka aiñ kan ïeng rasong.
