Shillong, Jymmang 14
U Raphael Varane u la pynbna ha ka Sngi Ba-ar ba un mih noh na ka Manchester United ha kaba kut ka aïom ïalehkai hadien ba ka kontrak jong u kaba lai snem kan poi sha kaba kut bad kane ka klob kaba na Old Trafford.
Une u rangïalehkai shadien barim ka France ba la 31 snem ka rta, u la pynïasoh sha kane ka klob hadien ba u la mih noh na ka Real Madrid ha u 2021 bad u la ïoh ïa ka jingsiew kumba £34 million ($43 million) bad u la ïoh ban ïalehkai 93 sien bad thep ar kol.
Une u rangïalehkai u la ïoh ban ïadon bynta bad kane ka klob kaba la rah ïa ka trophy nam jop kaba nyngkong eh ha ki hynriew snem kata ka League Cup 2023. U Varane, uba la shah ktah ka kontrak jong u bad ka United na ka daw ka jingmynsaw, um shym la ïoh ban ïalehkai naduh ba ka kynhun ka la shah rem da 4-3 kol ha ka Chelsea ha ka 4 tarik u Ïaïong bad u la khmih lynti ban ïoh ïalehkai shwa ban kut ka aïom ïalehkai.
“Ïa baroh ki para nongïalehkai bad kumjuh ki paidbah nongkyrshan ka Manchester United ka long ka jingkmen kaba khraw haba nga don katto katne snem bad kane ka klob bad katno ka long ka jingsngew sarong ban phong ïa ka jersey jong kane ka klob,” la pynpaw u u Varane hapoh social media.
“Ka long ka sien kaba nyngkong eh ïa nga ban ïoh rung ha Old Trafford kum u rangïalehkai ka Man United bad ka jingïalehkai ka long kaba phylla. Nga ïoh ka jingïeid na kane ka klob bad kumjuh ki nongkyrshan. Phi hap ban ïalehkai na ka bynta ka Man United khnang ban sngewthuh ïa kaei kaba phi mihkhmat.”
Une u rangïalehkai uba la don bynta bad ka France kaba la rah ïa ka nam lahduh ha ka World Cup 2018. “Watla ngi la ïakynduh jingeh ha kane ka aïom, hynrei nga khmih lynti ba ngan nangkiew ha ka kam ïalehkai. Ki trai kiba thymmai (United co-owner Jim Ratcliffe) ki long kiba don ïa ka jingthmu na ka bynta kane ka klob.”
Kat kum ka kyrwoh ba la pyllait da ka United la ong ba u Varane uba la pynthikna ba un mih noh, u la long u rangïalehkai ba kynsai”.
Kumba ka paw kane ka kynhun jong u Erik ten Hag ka dangsah sa ar sien ïakhun pyrshah ïa ka Newcastle bad ka Brighton, shwa ba kan ïakynduh ïa ka Manchester City ha ka final jong ka FA Cup ka ban long ha ka 25 tarik mynta u bnai.
